అశోక్‌ సెల్వన్‌ నటిస్తున్న ద్విభాషా చిత్రం 'ఆకాశం'. వయాకామ్‌ 18, రైజ్‌ ఈస్ట్‌ బ్యానర్స్‌పై ఆర్‌.ఎ.కార్తీక్‌ దర్శకత్వంలో రూపొందిన ఈ చిత్రంలో రీతూ వర్మ, అపర్ణ బాల మురళి, శివాత్మిక రాజశేఖర్‌ కథానాయికలు. ఈ చిత్రం 'నీదాం ఒరు వానమ్‌'గా తమిళంలోనూ ఈనెల 4న ప్రేక్షకుల ముందుకు రానుంది.
ఈ సందర్భంగా ఏర్పాటు చేసిన మీడియా సమావేశంలో హీరో అశోక్‌ సెల్వన్‌ మాట్లాడుతూ, 'ఇదొక ఫీల్‌గుడ్‌ రొమాంటిక్‌ డ్రామా చిత్రం. మంచి కంటెంట్‌తో సినిమాలు తీస్తే తెలుగు ప్రేక్షకులు కచ్చితంగా ఆదరిస్తారు. అలాంటి మంచి కంటెంట్‌తో వస్తున్న ఈ చిత్రం కూడా ప్రేక్షకుల్ని మెప్పిస్తుంది' అని అన్నారు. 'ఇందులో అశోక్‌ సెల్వన్‌ మూడు డిఫరెంట్‌ పీరియడ్‌ ఆఫ్‌ టైమ్‌ల్సో కనిపిస్తారు. అతని లైఫ్‌లో మూడు దశల్లోని జీవితాన్ని ఈ చిత్రంలో చూడొచ్చు. ప్రేమ, మోసం సహా లైఫ్‌లోని ఇతర భావోద్వేగాలను ఆయన ఎంతో అద్భుతంగా పండించారు' అని దర్శకుడు ఆర్‌.ఎ.కార్తీక్‌ చెప్పారు. శివాత్మిక రాజశేఖర్‌ మాట్లాడుతూ, 'కథలో ఎంత నిజాయితీ ఉంటుందో, సినిమాని కూడా దర్శకుడు అంతే నిజాయితీగా తెరకెక్కించారు. ఓ ఆహ్లాదకరమైన జీవితాన్ని, ప్రేమలోని కోణాల్ని ఇందులో మీరు చూస్తారు' అని అన్నారు.
'సినిమాటోగ్రాఫర్‌ అయ్యన్న అందించిన విజువల్స్‌, గోపి సుందర్‌ సంగీతం, బ్యాగ్రౌండ్‌ స్కోర్‌ అద్భుతంగా ఉన్నాయి. ఇంత మంచి సినిమాలో నటించే అవకాశం రావడం హ్యాపీగా ఉంది' అని మరో నాయిక రీతూవర్మ తెలిపారు.
