ఉదయ్‌ శంకర్‌ హీరోగా నటిస్తున్న సినిమా 'నచ్చింది గర్ల్‌ఫ్రెండూ'. జెన్నీ నాయికగా నటిస్తోంది. శ్రీరామ్‌ ఆర్ట్స్‌ బ్యానర్‌ పై అట్లూరి ఆర్‌ సౌజన్య సమర్పణలో, అట్లూరి నారాయణ రావు నిర్మిస్తున్నారు. గురు పవన్‌ దర్శకుడు. ఈ సినిమా ఈ నెల 11న రిలీజ్‌ కానుంది. ఈ నేపథ్యంలో ఆదివారం ఈ చిత్ర విశేషాలను దర్శకుడు గురు పవన్‌ మీడియాతో షేర్‌ చేసుకున్నారు. ఆ విశేషాలు ఆయన మాటల్లోనే..
ఉదయ్‌శంకర్‌ కెరీర్‌లో మరో భిన్న సినిమా
నా మొదటి సినిమా 'ఇదే మా కథ'. శ్రీకాంత్‌, భూమిక, సుమంత్‌ అశ్విన్‌ ప్రధాన పాత్రల్లో నటించారు. ఆ సినిమా విడుదలైన వెంటనే ఈ ప్రాజెక్ట్‌ మొదలుపెట్టాం. ఉదయ్‌ శంకర్‌ గతంలో మంచి మూవీస్‌ చేశారు. 'ఆటగదరా శివ', 'మిస్‌మ్యాచ్‌' వంటి చిత్రాలు ఆయన నట ప్రతిభ చూపించాయి. ఈ సినిమా కూడా ఆయన కెరీర్‌లో ఓ డిఫరెంట్‌ మూవీ అవుతుంది.
థ్రిల్లింగ్‌ లవ్‌స్టోరీ
వైజాగ్‌ నేపథ్యంగా థ్రిల్లర్‌ ఎలిమెంట్‌తో సాగే లవ్‌ స్టోరీ ఇది. సినిమాలో ఆహ్లాదకరమైన ప్రేమకథతో పాటు ఆసక్తిని పంచే థ్రిల్లింగ్‌ అంశాలుంటాయి. ఒక్కమాటలో చెప్పాలంటే ఇదొక రోడ్‌ జర్నీ మూవీ. ఈ చిత్రంలో ఉదయ్‌ క్యారెక్టర్‌ ఏంటంటే, తను ఎవరైనా అమ్మాయిని ఇష్టపడితే ఆమెను ప్రేమలో పడేస్తాడు. ఈ క్యారెక్టర్‌లో తన నటన ఆకట్టుకుంటుంది. హీరోయిన్‌ జెన్నీఫర్‌ ఇమ్మాన్యుయేల్‌ గతంలో ఓ చిన్న సినిమాలో నటించింది. కానీ ఇది తనకు రియల్‌ డెబ్యూ అనుకోవచ్చు. తన పాత్రకు తగినట్లు ఎలా చెబితే అలా నటించింది. ఆమెకు ఈ సినిమాతో మంచి పేరొస్తుంది.
ఇన్వెస్ట్‌మెంట్‌ యాప్స్‌లో తప్పు జరిగితే..
ఈ సినిమాలో ఇప్పటిదాకా తెరపై చూడని ఒక అంశాన్ని చెప్పబోతున్నాం. మనందరి ఫోన్స్‌లో ఇన్వెస్ట్‌మెంట్స్‌ యాప్స్‌ ఉంటాయి. వాటి ద్వారా ఒక తప్పు జరిగితే దేశవ్యాప్తంగా ఎంతమంది నష్టపోతారు. వారిని ఆ సమస్య నుంచి హీరో ఎలా బయటపడేశాడు అనేది ఆసక్తికరంగా ఉంటుంది. ఈ సమస్యను ఒక సూపర్‌ హీరోలా కాకుండా సాధారణ వ్యక్తిగా తనకున్న ప్రతిభతో పరిష్కరిస్తాడు. దేశంలో జరిగిన ఈ పెద్ద ఘటన నేపథ్యాన్ని ప్రేమ కథకు ముడిపెట్టాం.
మ్యూజిక్, సినిమాటోగ్రఫీ హైలెట్‌
సినిమాలో శ్రీకాంత్‌ అయ్యంగార్‌, మధునందన్‌ పాత్రలు కీలకంగా ఉంటాయి. వారు తమ బెస్ట్‌ పర్మార్మెన్స్‌ ఇచ్చారు. ఈ కథను అనుకున్నది అనుకున్నట్లుగా తెరపైకి తీసుకొచ్చేందుకు నిర్మాత అట్లూరి నారాయణ రావు సపోర్ట్‌ ఎంతో ఉంది. మ్యూజిక్, సినిమాటోగ్రఫీ విషయాల్లో సినిమా ఉన్నతంగా ఉంటుంది. సిద్ధం మనోహర్‌ సినిమాటోగ్రఫీ, గిఫ్టన్‌ మ్యూజిక్ హైలెట్‌ అవుతాయి. మంచి పాటలు, నేపథ్య సంగీతం ఇచ్చారు గిఫ్టన్‌. థ్రిల్లింగ్‌ లవ్‌ స్టోరీగా మిమ్మల్ని ఆకట్టుకుంటుంది.
