హీరో నాగశౌర్య 24వ చిత్రానికి నూతన దర్శకుడు ఎస్‌ఎస్‌ అరుణాచలమ్‌ దర్శకత్వం వహిస్తున్నారు. వైష్ణవి ఫిలింస్‌ బ్యానర్‌ పై ప్రొడక్షన్‌ నెం.1గా శ్రీనివాసరావు చింతలపూడి, విజయ్‌ కుమార్‌ చింతలపూడి, డా. అశోక్‌ కుమార్‌ చింతలపూడి ఈ చిత్రాన్ని నిర్మిస్తున్నారు. బేబీ అద్వైత, భవిష్య సమర్పకులు.
ఈ చిత్ర పూజా కార్యక్రమానికి విచ్చేసిన దర్శకుడు వి.వి.వినాయక్‌ ముహూర్తం షాట్‌కు క్లాప్‌ ఇవ్వగా, అభిషేక్‌ అగర్వాల్‌ కెమెరా స్విచాన్‌ చేశారు. తొలి షాట్‌కి తిరుమల కిషోర్‌ దర్శకత్వం వహించారు. న్యూరో హాస్పిటల్‌ సాంబశివారెడ్డి, జి.ఎస్‌.కె ఇన్‌ఫ్రా టెక్ సంతోష్‌ కుమార్‌ స్క్రిప్ట్‌ను మేకర్స్‌కి అందజేశారు.
ఈ సినిమా నాగశౌర్య కెరీర్‌లో అత్యంత భారీ బడ్జెట్‌ చిత్రంగా రూపొందబోతుంది. యూత్‌, ఫ్యామిలీస్‌కి సంబంధించిన ఎలిమెంట్స్‌ ఉండే యాక్షన్‌ ఎంటర్‌టైనర్‌గా రూపొందుతున్న ఈ సినిమాలో నాగశౌర్య విభిన్నమైన పాత్రలో కనిపించనున్నారు. కథ, కథానాలు, పాత్ర పరంగా కూడా నాగశౌర్య కెరీర్‌లో ఇంతవరకు చేయని రీతిలో ఉంటాయి. ఇందులో ఆయనకి సంబంధించిన ప్రతి అంశమూ ప్రేక్షకుల్ని థ్రిల్‌ చేస్తుంది. ఈ కథను దర్శకుడు అరుణాచలమ్‌ ఎంతో అద్భుతంగా తెరకెక్కించబోతున్నారు. కీలక పాత్రల్లో ప్రముఖ తారాగణం కనిపించనుంది. అలాగే ఈ సినిమా కోసం అగ్ర శ్రేణి సాంకేతిక నిపుణులు పని చేయనున్నారు. సంగీత దర్శకుడు హారిస్‌ జయరాజ్‌ చాలా గ్యాప్‌ తర్వాత తెలుగులో ఈ చిత్రానికి సంగీతం అందించడం విశేషం. ఈ చిత్రానికి డీవోపీ: వెట్రి పళనిసామి, ఎడిటర్‌: ఛోటా కె ప్రసాద్‌, ఆర్ట్‌: సాయి ప్రవీణ్‌, ఎడిషినల్‌ స్క్రీన్‌ప్లే: ఎస్‌.వి శేఖర్‌, ఎగ్జిక్యూటివ్‌ నిర్మాత: బండి భాస్కర్‌.
