దర్శకుడు వివేక్‌ రంజన్‌ అగ్నిహోత్రి 'కశ్మీర్‌ ఫైల్స్‌' చిత్రంతో దేశవ్యాప్తంగా సంచలనం సృష్టించిన విషయం విదితమే. తాజాగా దర్శకుడు వివేక్‌ రంజన్‌ అగ్నిహోత్రి తన రాబోయే చిత్ర టైటిల్‌ గురించి సోషల్‌ మీడియాలో ఇచ్చిన పజిల్‌ అందరిలోనూ అమితాసక్తిని పెంచింది. అందరి ఆసక్తిని మరింత రెట్టింపు చేస్తూ ఆయన తీయబోయే చిత్రానికి 'ది వ్యాక్సిన్‌ వార్‌' టైటిల్‌ని ఖరారు చేశారు. దేశంలో కోవిడ్‌ టీకా కోసం జరిగిన కసరత్తులకు సంబంధించిన అంశాలను ఈ చిత్రంలో చూపించబోతున్నారని టైటిల్‌, పోస్టర్‌ ద్వారా స్పష్టంగా తెలుస్తోంది. పోస్టర్‌లో కోవిడ్‌ వ్యాక్సిన్‌ను కలిగి ఉన్న వీల్‌ను చూడవచ్చు. అలాగే 'మీకు తెలియని యుద్ధంలో మీరు పోరాడి గెలిచారు' అనే సందేశం కూడా కనిపిస్తోంది. వచ్చే ఏడాది స్వాతంత్య్ర దినోత్సవం సందర్భంగా ఆగస్టు 15న ఈ చిత్రాన్ని ప్రేక్షకుల ముందుకు తీసుకొస్తున్నట్లు పోస్టర్‌ ద్వారా ప్రకటించారు. భారతీయ సినిమా చరిత్రలో తొలిసారి 11 భాషల్లో దీనిని విడుదల చేయనున్నారు. హిందీ, ఇంగ్లీష్‌, గుజరాతీ, పంజాబీ, భోజ్‌పురి, బెంగాలీ, మరాఠీ, తెలుగు, తమిళం, కన్నడ, ఉర్దూ, అస్సామీ భాషల్లో ఐ యామ్‌ బుద్ధ ప్రొడక్షన్‌ పతాకం పై పల్లవి జోషి ఈ చిత్రాన్ని నిర్మిస్తుండగా, అభిషేక్‌ అగర్వాల్‌ ఆర్ట్స్‌ బ్యానర్‌ ద్వారా అభిషేక్‌ అగర్వాల్‌ దేశవ్యాప్తంగా విడుదల చేయబోతున్నారు.
