శ్రీ ధనలక్ష్మీ మూవీస్‌ పతాకంపై బీసు చందర్‌ గౌడ్‌ నిర్మిస్తున్న ప్రేమ కథాచిత్రం 'సీతారామపురంలో ఒక ప్రేమ జంట'.ఎం.వినరుబాబు దర్శకత్వంలో రణధీర్‌, నందిని హీరో, హీరోయిన్లుగా నటించారు. ప్రపంచ వ్యాప్తంగా ఈనెల 18న అత్యధిక థియేటర్లలో ఈ సినిమా విడుదలకు సిద్ధమవుతున్న సందర్భంగా శనివారం చిత్ర బృందం ప్రీ రిలీజ్‌ ఈవెంట్‌ను ఘనంగా నిర్వహించింది.
దర్శకుడు ఎం. వినరుబాబు మాట్లాడుతూ, 'ఈ చిత్రంలో మంచి కంటెంట్‌తో పాటు కమర్షియల్‌ ఎలిమెంట్స్‌ ఉంటాయి. మా నిర్మాత ఎక్కడా రాజీపడకుండా క్వాలిటీగా సినిమాను నిర్మించారు. ఇప్పటికే విడుదలైన టీజర్‌, పాటలకు ప్రేక్షకుల నుంచి అద్భుతమైన స్పందన వచ్చింది. థియేటర్‌కు వచ్చిన ప్రేక్షకుడిని మా సినిమా ఏ మాత్రం డిజప్పాయింట్‌ చేయదు' అని అన్నారు.
'విలేజ్‌ బ్యాక్‌డ్రాప్‌లో జరిగే విభిన్నమైన ప్రేమకథా చిత్రమిది. ఇప్పటి వరకు గ్రామీణ నేపథ్యంలో ఎన్నో ప్రేమకథా చిత్రాలు వచ్చాయి. కానీ వాటికీ మా చిత్రానికి ఎంతో డిఫరెన్స్‌ ఉంది. దర్శకుడు వినరుబాబు అత్భుతమైన ట్విస్ట్‌లతో సినిమాను ఇంట్రెస్టింగ్‌గా తెరక్కించారు. కచ్చితంగా ఇదొక ట్రెండ్‌ సెట్టర్‌గా నిలుస్తుంది. అలాగే అంతర్లీనంగా మంచి సందేశం కూడా ఉంటుంది. మా చిత్రాన్ని యువతతో పాటు ప్రతి తల్లీదండ్రి చూసేలా ఉంటుంది' అని నిర్మాత బీసు చందర్‌ గౌడ్‌ చెప్పారు.
హీరో రణధీర్‌ మాట్లాడుతూ, 'దర్శకుడు వినరు బాబు సపోర్ట్‌తో ఈ సినిమా చేయగలిగాను. నన్ను నమ్మి మా నాన్న నన్ను హీరోగా పరిచయం చేస్తూ ఈ సినిమా నిర్మించారు. మంచి పబ్లిసిటీ చేస్తున్నారు' అని తెలిపారు. హీరోయిన్‌ నందిని మాట్లాడుతూ, 'ఒక మంచి చిత్రంలో నటించే అవకాశం కల్పించిన దర్శక నిర్మాతలకు నా కృతజ్ఞతలు' అని అన్నారు.
నిర్మాత టి.రామసత్యనారాయణ మాట్లాడుతూ, 'సినిమా చూశాను. అద్భుతంగా వచ్చింది. డైరెక్టర్‌ వినరు ఒక మంచి కంటెంట్‌తో సినిమా తీశాడు. నిర్మాత రాజీపడకుండా కథకు కావాల్సినంత ఖర్చు పెట్టాడు. పబ్లిసిటీ కూడా బాగా చేస్తున్నారు. సినిమా విజయవంతం కావాలి. అలాగే హీరో, హీరోయిన్లకు మరిన్ని అవకాశాలు రావాలి' అని చెప్పారు.
