అబుజా ఎంటర్టైన్మెంట్స్‌, శ్రీ లీల ఎంటర్టైన్మెంట్స్‌ పతాకంపై వెంకట్‌ కళ్యాణ్‌ హీరోగా నటిస్తూ దర్శకత్వం వహిస్తున్న చిత్రం 'చెడ్డి గ్యాంగ్‌ తమాషా'. గాయత్రి పటేల్‌ హీరోయిన్‌. సిహెచ్‌ క్రాంతి కిరణ్‌ నిర్మాణంలో తెరకెక్కుతున్న ఈ చిత్రం షూటింగ్‌ పూర్తి చేసుకుని, సెన్సార్‌కు వెళ్ళబోతున్న సందర్బంగా చిత్ర టీజర్‌ను గ్రాండ్‌గా రిలీజ్‌ చేశారు. ఈ కార్యక్రమానికి ముఖ్య అతిథిగా వచ్చిన దర్శకుడు నాగ్‌ అశ్విన్‌ టీజర్‌ ను విడుదల చేశారు. ఈ నేపథ్యంలో ఆయన మాట్లాడుతూ, 'టీజర్‌ చాలా బాగుంది. సినిమా టీజర్‌ చూస్తుంటే యంగ్‌ టీంతో మేము తీసిన 'ఎవడే సుబ్రహ్మణ్యం' సినిమా గుర్తుకు వస్తుంది. ఆ సినిమాలాగే ఈ సినిమా గొప్ప విజయం సాధించాలి' అని చెప్పారు.
నిర్మాత సిహెచ్‌ క్రాంతి కిరణ్‌ మాట్లాడుతూ, 'ఇందులోని పాటలు అందరినీ ఆకట్టుకుంటాయి. హీరోయిన్‌కు ఇది మొదటి సినిమా అయినా చాలా బాగా నటించారు. దర్శకుడు వెంకట్‌ హీరోగా, దర్శకుడిగా రెండింటిని బ్యాలెన్స్‌ చేస్తూ చాలా బాగా చేశాడు. మంచి కథతో తీసిన ఈ సినిమా ప్రతి ఒక్కరికీ కచ్చితంగా నచ్చుతుంది' అని తెలిపారు. 'ఇది నా 15 సంవత్సరాల కల. సినిమా మీద ప్యాషన్‌తో నటుడు అవ్వాలనే మా అమ్మ కోరికతో ఇండిస్టీకి వచ్చాను. అది ఇప్పుడు నెరవేరింది. ఇందులో నటించిన ప్రతి ఒక్కరూ చాలా బాగా నటించడంతో చూస్తున్న ప్రేక్షకులకు ఇది కొత్త సినిమాలా అనిపించదు. ఈ చిత్రం అన్ని వర్గాల వారిని, అన్ని వయసుల వారిని, అన్ని కుల, మతాల వారిని ఆకర్షించే హాస్య భరితమైన చిత్రంగా నిలుస్తుందని కచ్చితంగా చెప్పగలను' అని హీరో, దర్శకుడు వెంకట్‌ కళ్యాణ్‌ అన్నారు.
హీరోయిన్‌ గాయత్రి పటేల్‌ మాట్లాడుతూ, 'ఇది నా మొదటి చిత్రం. మంచి కథతో వస్తున్న ఈ సినిమా ప్రతి ఒక్కరికీ నచ్చుతుంది. ఇలాంటి మంచి సినిమాలో నటించే అవకాశం ఇచ్చిన దర్శక, నిర్మాతలకు థ్యాంక్స్‌' అని చెప్పారు. 'ఈ సినిమాలోని పాటలు బాగా వచ్చాయి. ఇప్పటికే పాటలు అందర్నీ విశేషంగా అలరిస్తున్నాయి. ఇలాంటి మంచి సినిమాకు మ్యూజిక్ చేసే అవకాశం ఇచ్చిన మేకర్స్‌కు కృతజ్ఞతలు' అని మ్యూజిక్ డైరెక్టర్‌ అర్జున్ అన్నారు.
