- హీరో విశాల్‌
విశాల్‌ హీరోగా ఎ.వినోద్‌ కుమార్‌ దర్శకత్వంలో రానా ప్రొడక్షన్స్‌పై రాబోతోన్న హై ఆక్టేవ్‌ యాక్షన్‌ ఎంటర్‌ టైనర్‌ 'లాఠీ'. రమణ, నంద సంయుక్త నిర్మాణంలో భారీగా తెరకెక్కిస్తున్నారు. సునయన హీరోయిన్‌. తెలుగు, తమిళం, హిందీ, మలయాళం, కన్నడ భాషల్లో డిసెంబర్‌ 22న విడుదల కానున్న ఈ పాన్‌ ఇండియా మూవీ టీజర్‌, ఫస్ట్‌ సింగిల్‌, గ్లింప్స్‌ లాంచింగ్‌ ఈవెంట్‌ జేఆర్సీ కన్వెన్షన్‌ హాల్‌లో గ్రాండ్‌గా జరిగింది. రచయిత విజయేంద్రప్రసాద్‌ ముఖ్య అతిథిగా పాల్గొని టీజర్‌ని లాంచ్‌ చేశారు. ఈ ఈవెంట్‌లో పోలీస్‌ డ్రెస్‌తో బైక్‌ పై వేదిక వద్దకు విశాల్‌ రావడం అందర్నీ ఆకట్టుకుంది.
ఈ సందర్భంగా విశాల్‌ మాట్లాడుతూ, 'దర్శకుడు వినోద్‌ కుమార్‌ గురించి సినిమా విడుదలైన తర్వాత సిల్వర్‌ స్క్రీనే చెబుతుంది. సినిమా నిర్మాతలు రమణ, నంద నా స్నేహితులు. చాలా ప్యాషన్‌తో ఈ సినిమా చేశాం. యువన్‌ శంకర్‌ రాజా నాకు చాలా బ్లాక్‌ బస్టర్స్‌ ఆల్బమ్స్‌ ఇచ్చారు. దీనికి బ్రిలియంట్‌ స్కోర్‌ చేసారు. డాక్టర్‌ పవన్‌ సినిమాని తెలుగులో పంపిణీ చేస్తున్నారు. నా ప్రతి సినిమాలానే.. ఈ సినిమాని కూడా ఎంత మంది చూస్తారో ఒకొక్క టికెట్‌కి ఒక్కో రూపాయి చొప్పున రైతులకు ఇస్తాను' అని తెలిపారు.
'విశాల్‌కి ఒక జబ్బు అంటుకుంది. సినిమా కథ ఎంత బడ్జెట్‌ అయినా ఎన్ని రోజులైనా షూటింగ్‌ చేయాలనే జబ్బు. ఈ జబ్బు మా అబ్బాయి రాజమౌళి దగ్గర నుండి అంటుకుంది(నవ్వుతూ) మా అబ్బాయి ఎలా అయితే సక్సెస్‌ అందుకున్నాడో మంచి మనసున్న విశాల్‌ కూడా విజయాన్ని అందుకుంటారు' అని రచయిత విజయేంద్రప్రసాద్‌ అన్నారు.
