సమంత ప్రధాన పాత్రధారిగా రూపొందిన చిత్రం 'యశోద'. ప్రపంచ వ్యాప్తంగా ఇటీవల విడుదలైన ఈ చిత్రం విశేష ప్రేక్షకాదరణ పొందింది. ఈ నేపథ్యంలో తనపై ప్రేమ చూపిస్తున్న అభిమానులు, ప్రేక్షకులకు సమంత సోషల్‌ మీడియా వేదికగా ధన్యవాదాలు తెలిపారు.
ఇన్‌స్టా వేదికగా ఆమె స్పందిస్తూ, ''ప్రియమైన ప్రేక్షకులకు 'యశోద' పై మీరు చూపిస్తున్న ప్రేమ, ఆదరణకు ధన్యవాదాలు. మీ ప్రశంసలు, మీరు ఇస్తున్న మద్దతు చూస్తున్నాను. ఇదే నాకు లభించిన గొప్ప బహుమతి. సినిమాకు వస్తున్న స్పందన నాకెంతో సంతోషాన్ని ఇస్తోంది. 'యశోద' చిత్రాన్ని ప్రదరిస్తున్న థియేటర్లలో మీ సంబరాలు చూశాను. సినిమా గురించి మీరు చెప్పిన మాటలు విన్నాను. దీని వెనుక మా చిత్ర బృందం అహర్నిశలు నిర్విరామంగా పడ్డ కష్టం ఉంది. ఇప్పుడు నా మనసు గాల్లో తేలుతున్నట్టుగా ఉంది. 'యశోద' మీ ముందుకు రావడానికి కారణమైన వాళ్ళకు, ఈ ప్రాజెక్టులో ఇన్వాల్వ్‌ అయిన వాళ్ళకు ఈ సందర్భంగా థ్యాంక్స్‌ చెబుతున్నాను. నా పైన, ఈ కథపైన నమ్మకం ఉంచిన నిర్మాత, శ్రీదేవి మూవీస్‌ శివలెంక కృష్ణప్రసాద్‌ గారికి కృతజ్ఞతలు. దర్శకులు హరి, హరీష్‌తో పని చేయడం నాకు ఎంతో సంతోషాన్ని కలిగించింది. ఈ కథ కోసం ఎంతో రీసెర్చ్‌ చేశారు. వరలక్ష్మీ శరత్‌ కుమార్‌కి, ఉన్ని ముకుందన్‌కి, మిగతా నటీనటులు, సాంకేతిక నిపుణులకు థ్యాంక్స్‌' అని అన్నారు.
