వరుస హిట్‌ సినిమాలను నిర్మిస్తున్న జీఏ 2 పిక్చర్స్‌లో రాబోతున్న తదుపరి చిత్రం '18 పేజిస్‌'. నిఖిల్‌ సిద్దార్థ, అనుపమ పరమేశ్వరన్‌ జంటగా నటిస్తున్న ఈ సినిమాను బన్నీ వాసు నిర్మిస్తున్నారు. అల్లు అరవింద్‌ సమర్పిస్తున్నారు. ఇదివరకే రిలీజైన ఈ చిత్ర టీజర్‌ సినిమాపై మరిన్ని అంచనాలను పెంచేసింది.
ఇటీవలే 'కార్తికేయ-2' సినిమాతో పాన్‌ ఇండియా హిట్‌ అందు కున్నారు నిఖిల్‌ సిద్ధార్థ, అనుపమ పరమేశ్వరన్‌. మాములు చిన్న సినిమాగా విడుదలైన ఈ చిత్రం రోజు రోజుకు థియేటర్స్‌ను, కలెక్షన్స్‌ను పెంచుకుంటూ తిరుగులేని విజయాన్ని సాధించింది. కృష్ణ తత్వాన్ని, కృష్ణ సారాంశాన్ని చెప్పిన ఈ చిత్రం ప్రపంచవ్యాప్తంగా అద్భుతమైన వసూళ్ళు సాధించింది. అంతటి ఘనవిజయం సాధించిన 'కార్తికేయ- 2' తరువాత అనుపమ పరమేశ్వరన్‌, నిఖిల్‌ జంటగా చేస్తున్న చిత్రం కావడంతో ఈ సినిమాపై మంచి అంచనాలు ఉన్నాయి. డిసెంబర్‌ 23న ఈ చిత్రాన్ని ప్రేక్షకుల ముందుకు తీసుకురానున్నారు. ఈ నాస్టాల్జిక్‌ రొమాన్స్‌ని దర్శకుడు సుకుమార్‌ రాశారు. గతంలో 'కుమారి 21 ఎఫ్‌' చిత్రంతో హిట్‌ అందుకున్న పల్నాటి సూర్య ప్రతాప్‌ ఈ చిత్రానికి దర్శకత్వం వహిస్తున్నారు.
ఈ చిత్రం నుండి విడుదల కాబోయే సాంగ్‌ అప్డేట్‌ను అధికారికంగా ప్రటించారు మేకర్స్‌. ఈ చిత్రం నుండి 'నన్నయ్య రాసిన' అనే లిరికల్‌ వీడియో సాంగ్‌ను ఈనెల 22న విడుదల చేయనున్నట్లు తెలిపారు.
ఈ చిత్రానికి స్క్రీన్‌ ప్లే - దర్శకత్వం: పల్నాటి సూర్య ప్రతాప్‌, కథ: సుకుమార్‌, సంగీతం: గోపీ సుందర్‌, సినిమాటోగ్రఫీ: వసంత్‌, ఎడిటర్‌: నవీన్‌ నూలి, ఆర్ట్‌ డైరెక్టర్‌: రమణ వంక, ఎగ్జిక్యూటివ్‌ నిర్మాతలు: శరణ్‌ రాపర్తి (గీతా ఆర్ట్స్‌), అశోక్‌ బండ్రెడ్డి, రచయిత: శ్రీకాంత్‌ విస్సా, లైన్‌ ప్రొడ్యూసర్‌: బాబు.
