'జార్జ్‌ రెడ్డి' చిత్రంతో నటుడిగా మంచి గుర్తింపు తెచ్చుకున్నారు నవీన్‌ బేతిగంటి. ఆయన హీరోగా నటిస్తూ, దర్శకత్వం వహిస్తున్న సినిమా 'రామన్న
యూత్‌'. ఈ చిత్రాన్ని ఫైర్‌ ఫ్లై ఆర్ట్స్‌ పతాకంపై రజినీ నిర్మిస్తున్నారు. త్వరలోనే ఈ సినిమా విడుదలకు సన్నాహాలు చేస్తున్నారు. ఎంటర్‌టైనింగ్‌ పొలిటికల్‌ డ్రామాగా తెరకెక్కుతున్న ఈచిత్ర కాన్సెప్ట్‌ ట్రైలర్‌ను ఆదివారం రామానాయుడు స్టూడియోలో జరిగిన కార్యక్రమంలో దర్శకుడు శేఖర్‌ కమ్ముల విడుదల చేశారు. అనంతరం ఆయన మాట్లాడుతూ, 'ట్రైలర్‌ బాగుంది. నాయకుడి వెంట తిరిగితే తమకో లైఫ్‌ ఉంటుందనే వారికి తాము నిర్లక్ష్యం చేయబడితే ఎలాంటి పరిస్థితులు ఎదుర్కొన్నారు అనేది చిత్ర కథాంశంగా తెలుస్తోంది. నాయకుల కోసం జెండాలు ఎత్తిన వారు ఏమవుతారు అనేది మంచి పాయింట్‌. ఇక్కడే నవీన్‌ సక్సెస్‌ అయ్యాడు. ఇది మనం చూసిన ఒక ఊరి కథ' అని తెలిపారు.
దర్శకుడు, హీరో నవీన్‌ బేతిగంటి మాట్లాడుతూ, 'రాజకీయాల్లో కింది స్థాయిలో తిరిగే ఒక యువకుడి కథ ఇది. అతని జీవితంలోకి మిగతా వారు ఎలా ఇన్వాల్వ్‌ అయ్యారన్నది ఆసక్తికరంగా చూపిస్తున్నాం. ఆరు ప్రధాన పాత్రల చుట్టూ కథ సాగుతుంది' అని తెలిపారు.
