శివ బాలాజీ, ధర్మ, బ్రిగిడ సాగ (పవి టీచర్‌) ప్రధాన తారాగణంగా శ్రీ లక్ష్మీ నరసింహ మూవీ మేకర్స్‌ పతాకంపై షూటింగ్‌ పూర్తి చేసుకున్న చిత్రం 'సిందూరం'. ఈ సినిమాలోని మొదటి పాట 'ఆనందమో ఆవేశమో..'ను డైరెక్టర్‌ అనిల్‌ రావిపూడి విడుదల చేశారు. ఆదిత్య మ్యూజిక్ ద్వారా విడుదలైన ఈ సాంగ్‌కు నెటిజెన్స్‌ నుండి మంచి రెస్పాన్స్‌ లభిస్తోంది. ఎంతో ఆహ్లాదకరంగా రూపుదిద్దుకున్న ఈ పాటను అభరు జోద్పూర్కర్‌ ఆలపించారు. 'ఆర్య' సినిమాలోని 'ఉప్పెనంత ఈ ప్రేమకు' పాట రాసిన బాలాజీ ఈ పాటకు సాహిత్యం అందించగా, హరి గౌర సంగీతం అందించారు. ఈ సాంగ్‌లో ధర్మ, బ్రిగిడ సాగ బాగా నటించారని, సాంగ్‌ మెలోడీగా బాగా అలరిస్తోందనే కామెంట్స్‌ రావడం ఓ విశేషమైతే, హీరో విజయ్‌ సేతుపతి సైతం ఈ సాంగ్‌ గురించి ఇన్‌స్టాగ్రామ్‌లో పోస్ట్‌ చేయటం మరో విశేషం. మారేడుమిల్లి ఫారెస్ట్‌లో సింగిల్‌ షెడ్యూల్‌లో ఈ సినిమా షూటింగ్‌ను ఫినిష్‌ చేశారు. ఈ పాట చూసిన ప్రేక్షకులు ఆహ్లాదకరమైన చిత్రీకరణ, అద్భుతమైన సంగీతం కలగలిపి ఉండడాన్ని చూసి దర్శక, నిర్మాతల అభిరుచిని ప్రశంసిస్తున్నారు. ఒకప్పటి క్లాసిక్‌ 'సిందూరం' సినిమాను గుర్తు చేస్తున్న ఈ సినిమా రానున్న రోజుల్లో ఎన్ని సంచలనాలు సృష్టించనుందో వేచి చూడాలంటోంది చిత్ర యూనిట్‌.
ఈ చిత్రానికి డైరెక్టర్‌: శ్యామ్‌ తుమ్మలపల్లి, నిర్మాత: ప్రవీణ్‌ రెడ్డి జంగా, సహ నిర్మాతలు: చైతన్య కందుల, సుబ్బారెడ్డి.ఎం., రైటర్‌: కిషోర్‌ శ్రీ కృష్ణ, సినిమాటోగ్రఫీ: కేశవ్‌, ఎడిటర్‌: జస్విన్‌ ప్రభు, ఆర్ట్‌: ఆర్‌. మధుబాబు, ఎగ్జిక్యూటివ్‌ ప్రొడ్యూసర్‌: రామ బాలాజీ.డి
