రచయిత,. దర్శకుడు మదన్‌ కన్నుమూశారు. నాలుగు రోజుల క్రితం బ్రెయిన్‌ స్ట్రోక్‌కి గురైన ఆయన హైదరాబాద్‌లోని అపోలో ఆసుపత్రిలో చికిత్స పొందుతూ శనివారం తెల్లవారుజామున తుదిశ్వాస విడిచారు. మదన్‌ మరణ వార్తతో ఆయన కుటుంబంతోపాటు తెలుగుచిత్ర సీమలోనూ విషాదం నెలకొంది. ఆయన ఆత్మకు శాంతి చేకూరాలంటూ పలువురు సినీ తారలు సోషల్‌ మీడియా వేదికగా పోస్టులు పెట్టారు. అభిమానులు, శ్రేయోభిలాషుల సందర్శానార్థం మదన్‌ భౌతికకాయాన్ని ఆదివారం మధ్యాహ్నం మూడు గంటల వరకు ఫిల్మ్‌నగర్‌ మహా ప్రస్ధానంలో ఉంచారు. అనంతరం ఆయన అంత్యక్రియలు జరిగినట్టు కుటుంబ సభ్యులు తెలిపారు.
'ఆ నలుగురు' చిత్రంతో రచయితగా తన ప్రతిభ నిరూపించుకుని, 'పెళ్ళయిన కొత్తలో' చిత్రంతో దర్శకుడిగా కూడా తనసత్తా చాటుకున్నారు. జగపతిబాబు, ప్రియమణి నటించిన ఈ చిత్రం విశేష ప్రేక్షకాదరణతో మంచి విజయాన్ని సొంతం చేసుకుంది. ఆ తర్వాత 'గుండె ఝల్లుమంది', 'ప్రవరాఖ్యుడు', 'కాఫీ విత్‌ మై వైఫ్‌', 'గరం', 'గాయత్రి' వంటి చిత్రాలకు దర్శకత్వం వహించారు.
