విష్ణు విశాల్‌ హీరోగా చెల్లా అయ్యావు దర్శకత్వంలో తెరకెక్కిన ఫ్యామిలీ, స్పోర్ట్స్‌ డ్రామా 'మట్టి కుస్తీ. ఐశ్వర్య లక్ష్మి కథానాయిక. ఆర్‌ టీ టీమ్వర్క్స్‌, విష్ణు విశాల్‌ స్టూడియోస్‌ బ్యానర్లపై రవితేజతో కలిసి విష్ణు విశాల్‌ నిర్మించిన ఈ చిత్రం డిసెంబర్‌ 2న ప్రపంచవ్యాప్తంగా రిలీజ్‌ అవుతోంది. ఈ నేపథ్యంలో కథానాయిక ఐశ్వర్య లక్ష్మి మీడియాతో 'మట్టి కుస్తీ' విశేషాలను షేర్‌ చేసుకున్నారు.
ఈ సినిమా నాకొక సవాల్‌
            ఇందులోని నా పాత్ర చాలా ఫిజికల్‌ వర్క్‌ని డిమాండ్‌ చేస్తుంది. దీని కోసం చాలా ఫిజికల్‌ ప్రిపరేషన్‌ కావాలి. ట్రైలర్‌లో స్టంట్స్‌ చూసే ఉంటారు. ఎమోషనల్‌ సీన్స్‌ చేయడం నాకు ఇష్టమే. కామెడీ అనేది నా వరకూ చాలా కష్టం. మొదటిసారి ఇందులో కామెడీని ప్రయత్నించా. ఇదివరకు నేను చేసిన పాత్రల్లో కామెడీ లేదు. అందుకే ఈసినిమా నాకు ఓ సవాల్‌. ప్రేక్షకులు ఎలా రిసీవ్‌ చేసుకుంటారో తెలీదు. దర్శకుడు నా ఫెర్‌ఫార్మెన్స్‌ పట్ల చాలా ఆనందంగా ఉన్నారు. ప్రేక్షకులకు కూడా నచ్చుతుందనే నమ్మకం వుంది.
పైసా వసూల్‌ గ్యారెంటీ..
            ఇది ఫ్యామిలీ డ్రామా. భార్యభర్తల కుస్తీ(నవ్వుతూ) ఇగో, వినోదం అన్నీ ఎలిమెంట్స్‌ ఉంటాయి. ప్రతి ఒక్కరూ ఈ సినిమాకి కనెక్ట్‌ అవుతారు. అంత చక్కని ఫ్యామిలీ ఎమోషన్స్‌, వినోదం ఉన్న చిత్రం ఈ మధ్యకాలంలో రాలేదు. ఆడ, మగ సమానమే అనే సందేశాన్ని చాలా వినోదాత్మకంగా చూపించాం. పైసా వసూల్‌ సినిమా ఇది. హీరో విష్ణు విశాల్‌ స్ఫూర్తినిచ్చే వ్యక్తి. చాలా హార్డ్‌ వర్క్‌ చేస్తారు. ది బెస్ట్‌ కోసం ప్రయత్నిస్తుంటారు. ఆయనకి కథల ఎంపికలో మంచి అభిరుచి ఉంది. ఆయన లాంటి విజన్‌ చాలా తక్కువ మందిలో కనిపిస్తుంటుంది. ఆయన నుండి చాలా నేర్చుకున్నాను. నటుడిగా, నిర్మాతగా ఆయన ప్రయాణం అద్భుతం. ఆయనతో పని చేయడం చాలా అనందం గా వుంది.
తెలుగు ప్రేక్షకుల అభిమానం.. ప్రేమే కారణం
            తెలుగు ప్రేక్షకులు సినిమాని గొప్పగా ప్రేమిస్తారు. అందుకే తెలుగు చిత్ర పరిశ్రమ ఇండియాలోనే బిగ్గెస్ట్‌ ఇండిస్టీగా ఎదిగింది. ఇండియన్‌ ఫిల్మ్‌ ఇండిస్టీని టాలీవుడ్‌ రూల్‌ చేస్తోంది. తెలుగు నుండి వస్తున్న ప్రతి ప్రాజెక్ట్‌కు గొప్ప ఆదరణ వస్తోంది. చాలా చిత్ర పరిశ్రమలు తెలుగు ఇండిస్టీని ఫాలో అవ్వడం గమనించాను. తెలుగు ప్రేక్షకులకు సినిమా పట్ల ఉన్న అభిమానం, ప్రేమే దీనికి కారణం. నేను కూడా తెలుగు సినిమాలు బాగా చూస్తాను. హీరోలందరూ ఇష్టమే.
కథ, విష్ణు విశాల్‌ని నమ్మారు
            రవితేజ ఈ సినిమాకి ఒక నిర్మాత. ఆయన షూటింగ్‌కి రాలేదు. విష్ణు విశాల్‌ని పూర్తిగా నమ్మి, కావాల్సింది సమకూర్చి ఫైనల్‌ ప్రోడక్ట్‌ని మాత్రమే చూపించమన్నారు. ఫైనల్‌ అవుట్‌ పుట్‌ని చూసి ఆయన చాలా హ్యాపీగా ఫీలయ్యారు. సినిమాల ఎంపికలో నాకు ఎలాంటి తొందరలేదు. మంచి కథ, గుర్తుపెట్టుకునే పాత్రలు చేయాలనేది నా ప్రయత్నం.