కన్నడ చలనచిత్ర పరిశ్రమలో శివ రాజ్‌కుమార్‌ ఒక ఐకానిక్‌ హీరో. ప్రస్తుతం ఆయన నటించిన చిత్రం 'వేద'. ఇది తన 125 చిత్రాల మైలురాయిగానే కాకుండా, తన భార్య గీతా శివ రాజ్‌కుమార్‌ నేతృత్వంలోని సొంత సంస్థ గీతా పిక్చర్స్‌ బ్యానర్‌లో ఇది మొదటి వెంచర్‌గా కూడా రావడం విశేషం.
ఇటీవలే కన్నడలో విడుదలై సంచలనం సృష్టించిన ఈ సినిమా త్వరలో తెలుగు రిలీజ్‌కు సిద్ధమవుతోంది. కంచి కామాక్షి కలకత్తా క్రియేషన్స్‌ ద్వారా ఈ సినిమా తెలుగులో రిలీజ్‌ కానుంది. దీనికి సంబంధించిన టైటిల్‌, మోషన్‌ పోస్టర్‌ను చిత్ర బృదం ఆవిష్కరించింది.
ఈ సందర్భంగా నిర్మాత వి.ఆర్‌.కృష్ణ మండపాటి మాట్లాడుతూ,'కథ నచ్చి ఈ సినిమా కొనుక్కున్నాను. ఒక మంచి సినిమాకి ఎప్పుడూ తెలుగు ప్రేక్షకులు బ్రహ్మరథం పడతారనే నమ్మకంతో దీన్ని తెలుగులో రిలీజ్‌ చేస్తున్నాను. త్వరలో ఈ చిత్ర ప్రీ రిలీజ్‌ ఈవెంట్‌ని గ్రాండ్‌గా నిర్వహించనున్నాం. శివ రాజ్‌ కుమార్‌ ఫ్యామిలీకి మన తెలుగులో కూడా ఎంత ఆదరణ ఉందో ప్రత్యేకంగా చెప్పనవసరం లేదు. మనం కూడా ఆయన్ని శివన్న అని పిలుచుకుంటాం. ఈ ప్రీ రిలీజ్‌ ఫంక్షన్‌కి వాళ్ళు కూడా హాజరవుతారు' అని తెలిపారు.
ఎ.హర్ష దర్శకత్వం వహించిన ఈ యాక్షన్‌ డ్రామా చిత్రం కన్నడలో డిసెంబర్‌ 23న విడుదలై సంచలనం సృష్టించింది. ఘనవి లక్ష్మణ్‌, అదితి సాగర్‌, శ్వేత చంగప్ప, ఉమాశ్రీ తదితరులు ఈ చిత్రంలో నటించారు. ఈ చిత్రానికి నిర్మాత : గీతా శివరాజ్‌కుమార్‌, సినిమాటోగ్రఫీ : స్వామి జె గౌడ్‌, ఎడిటర్‌: దీపు ఎస్‌ కుమార్‌, సంగీతం: అర్జున్‌జన్య.
