ముంబైకి చెందిన ప్రముఖ ఫ్యాషన్‌ మోడల్‌ బెవిలిన్‌ భరాజ్‌ తెలుగు సినిమా రంగంలో హీరోయిన్‌గా తన అదృష్టాన్ని పరీక్షించుకోవడానికి అడుగులు వేస్తున్నారు. ఈ నేపథ్యంలో తెలుగు సినీ రంగానికి కేంద్రబిందువైన హైదరాబాద్‌కి వచ్చారు.
ఈ సందర్భంగా ఆమె మీడియాతో మాట్లాడుతూ, 'మాది ముంబైలో వ్యాపార కుటుంబం. సోలార్‌ ఎనర్జీ బిజినెస్‌లో 'రే ఫోర్స్‌ గ్రీన్‌ టెక్ ప్రైవేట్‌ లిమిటెడ్‌' కంపెనీని నిర్వహిస్తున్నాం. నేను ఈ సంస్థలో డైరెక్టర్‌గా పని చేస్తున్నాను. ఫ్యాషన్‌ మోడలింగ్‌లో అడుగుపెట్టి మంచి విజయం సాధించాను. ఇంటర్నేషనల్‌ స్థాయిలో పాపులారిటీ సంపాదించాను. ఈ రంగంలో నాకు మంచి పేరు, స్టార్‌ డమ్‌ ఉంది. ఇప్పుడు సినిమాల్లో నటించడానికి కూడా మా పేరెంట్స్‌ ఎంతో ప్రోత్సహిస్తున్నారు. నేను నటనలో, డాన్సులో, ఫైట్స్‌లో శిక్షణ పొందాను. సినిమాలు అంటే చాలా ఇష్టం. తెలుగు సినిమాలు రెగ్యులర్‌గా చూస్తూ ఉంటాను. 'బాహుబలి, పుష్ప, ఆర్‌ఆర్‌ఆర్‌' వంటి సినిమాలు తెలుగు సినిమాని జాతీయ స్థాయికి చేర్చాయి. తెలుగు సినిమాలు చేయాలనుకుంటున్నాను. ఇక్కడ పలువురు దర్శక, నిర్మాతలను కలిశాను. హీరోయిన్‌, నెగిటివ్‌ షేడ్స్‌ ఉన్న హీరోయిన్‌, యాక్షన్‌ హీరోయిన్‌... ఇలా ఏ పాత్ర ఇచ్చినా న్యాయం చేస్తాను. బాలీవుడ్‌లో మా బంధువులు, స్నేహితులు చాలామంది పెద్ద స్థాయిలో ఉన్నారు. అయితే వారిలో ఎవరి పేరు ఉపయోగించుకోకుండా స్వశక్తితో నా కెరీర్‌ని నిర్మించుకోవాలి అనుకుంటున్నాను. అందుకే వారి పేర్లు చెప్పడం లేదు. హాలీవుడ్‌ హీరోయిన్‌లాగా కనిపించడం నాకు బాగా ప్లస్ అవుతుందని భావిస్తున్నాను. త్వరలోనే మంచి సినిమాతో తెలుగు ప్రేక్షకుల ముందుకు వస్తాను' అని చెప్పారు.
