ప్రముఖ నిర్మాణ సంస్థ సితార ఎంటర్టైన్మెంట్స్‌ నుంచి వస్తున్న మరో ఆసక్తికరమైన చిత్రం 'బుట్ట బొమ్మ'. ఫార్చ్యూన్‌ ఫోర్‌ సినిమాస్‌ భాగస్వామ్యంతో సితార ఎంటర్టైన్మెంట్స్‌ నిర్మించిన ఈ ఫీల్‌ గుడ్‌ రూరల్‌ డ్రామాకి సూర్యదేవర నాగ వంశీ, సాయి సౌజన్య నిర్మాతలు. అనిఖా సురేంద్రన్‌, సూర్య వశిష్ఠ, అర్జున్ దాస్‌ ప్రధాన పాత్రలు పోషిస్తున్న ఈ చిత్రంతో శౌరి చంద్రశేఖర్‌ రమేష్‌ దర్శకుడిగా పరిచయం అవుతున్నారు. ఈనెల 4న ప్రేక్షకుల ముందుకు ఈ చిత్రం రానున్న నేపథ్యంలో గురువారం హీరో సూర్య వశిష్ఠ సినిమాకి సంబంధించిన పలు ఆసక్తికర విశేషాలను మీడియాతో షేర్‌ చేసుకున్నారు.
మా నాన్నగారు 30 ఏళ్లకు పైగా సినీ పరిశ్రమలో ఉన్నారు. ఆయనను అందరూ సత్యం గారు అని పిలుస్తారు. రాఘవేంద్రరావు, రాజమౌళి, త్రివిక్రమ్‌ గారి దగ్గర కోడైరెక్టర్‌గా పనిచేశారు. నన్ను నటుడిగా చూడాలనేది ఆయన కోరిక. నాక్కూడా సినిమాలంటే చాలా ఇష్టం. అమెరికాలో చదువు పూర్తి చేసి, కొంతకాలం ఉద్యోగం చేశాక.. ఇక్కడికి వచ్చి సినిమా ప్రయత్నాలు మొదలు పెట్టాను.
ఒకసారి నాన్నగారు 'కప్పేల' సినిమాని చూపించి ఇందులోని ఆటో డ్రైవర్‌ పాత్ర నీకు సరిగ్గా సరిపోతుందని అన్నారు. ఆ తర్వాత ఆ మూవీ రీమేక్‌ రైట్స్‌ సితార సంస్థ తీసుకోవడంతో, మా వాళ్లే తీసుకున్నారు అంటూ ఎంతో సంతోషించారు. కానీ నాన్న కోవిడ్‌తో మరణించడంతో ఒక ఏడాది పాటు అసలు బయటకు రాలేదు. ఆ తర్వాత త్రివిక్రమ్‌గారి సూచన మేరకు సితారలో ఆడిషన్‌ ఇచ్చాను. అలా ఈ చిత్రానికి ఎంపిక అయ్యాను. మా నాన్నగారి చివరి కోరిక నెరవేరేలా చేసిన త్రివిక్రమ్‌కి, సితార సంస్థకి జీవితాంతం రుణపడి ఉంటాను.
మలయాళ వెర్షన్‌ చూసినప్పుడు ఈ సినిమా నాకు చాలా నచ్చింది. ఈ సినిమాలో ఇంత అద్భుతమైన పాత్ర పోషించే అవకాశం రావడం సంతోషంగా ఉంది. నాకు ఎప్పుడూ ఇలాంటి కొత్తదనం ఉన్న పాత్రలు పోషించాలని ఉంటుంది. ఈ సినిమాలో నా పాత్ర కొత్తగా, ఆకట్టుకునేలా ఉంటుంది. అనిఖా, అర్జున్ దాస్‌తో కలిసి పని చేయడం ఎంతో సరదాగా ఉండేది. అనిఖా మంచి మనసున్న అమ్మాయి. అర్జున్‌దాస్‌ అప్పటికే స్టార్‌. ఆయన తన గొంతుతో ఎందరో అభిమానులను సొంతం చేసుకున్నారు. దర్శకుడు రమేష్‌ ప్రతి సన్నివేశం, ప్రతి షాట్‌ మీద చాలా వర్క్‌ చేస్తారు.
ఇటీవల మా దర్శక, నిర్మాతలు సినిమా చూసి నా నటనను మెచ్చుకోవడంతో చాలా ఆనందం కలిగింది. నాకు సహజత్వానికి దగ్గరగా ఉండే సినిమాలు అంటే ఇష్టం. అలాంటి సినిమాల్లోనే ఎక్కువగా నటించాలి అనుకుంటున్నాను. ఈ సినిమా టీజర్‌ విడుదలయ్యాక పలువురు నూతన దర్శకులు నన్ను సంప్రదించారు. మరికొన్ని కథలు విని, ఈ సినిమా విడుదల తర్వాత నిర్ణయం తీసుకోవాలి అని అనుకుంటున్నాను.
