రక్షిత్‌ అట్లూరి హీరోగా, కోమలి ప్రసాద్‌ హీరోయిన్‌గా రూపొందుతున్న లవ్‌ అండ్‌ యాక్షన్‌ డ్రామా 'శశివదనే'. గౌరీ నాయుడు సమర్పణలో ఎస్‌.వి.ఎస్‌. కన్‌స్ట్రక్షన్స్‌ ప్రై.లి, ఎ.జి.ఫిల్మ్ కంపెనీ పతాకాలపై సాయి మోహన్‌ ఉబ్బన దర్శకత్వంలో అహితేజ బెల్లంకొండ నిర్మిస్తున్నారు. త్వరలో సినిమా విడుదల కానుంది. తాజాగా డైరెక్టర్‌ హరీష్‌ శంకర్‌ టైటిల్‌ సాంగ్‌ విడుదల చేశారు. హరి చరణ్‌, చిన్మయి శ్రీపాద పాడిన ఈ 'శశివదనే' పాటకు కిట్టు విస్సాప్రగడ సాహిత్యం అందించారు.
ఈ సందర్భంగా హరీష్‌ శంకర్‌ మాట్లాడుతూ, 'సంగీత దర్శకుడు శరవణన్‌కు కంగ్రాట్స్‌. చాలా రోజుల తర్వాత మంచి శాస్త్రీయ సంగీతాన్ని విన్నాను. మంచి తెలుగు టైటిల్‌ పెట్టారు. నాకు బాగా నచ్చింది. 'శశివదనే' అంటే మంచి చంద్రబింబం లాంటి ముఖం ఉన్న అమ్మాయి అని అర్థం. ఆల్‌ ది బెస్ట్‌ టు రక్షిత్‌, కోమలి. వాళ్లిద్దరి కెమిస్ట్రీ బావుంది. నిర్మాత అహితేజ, అభిలాషకి అడ్వాన్స్‌ కంగ్రాట్స్‌. ఒక్క సంగీతమే కాదు, సినిమాలో కూడా తెలుగు నేటివిటీ ఉంది. విజువల్స్‌ బావున్నాయి. మంచి సాహిత్యం, మంచి సంగీతంతో కూడిన చిత్రమిది' అని తెలిపారు.
'మా సాంగ్‌ని విడుదల చేసిన హరీష్‌ శంకర్‌కి థ్యాంక్స్‌. సాంగ్‌ చాలా బాగా వచ్చింది. కోమలీ అద్భుతంగా చేశారు' అని హీరో రక్షిత్‌ అట్లూరి చెప్పారు.
కోమలీ ప్రసాద్‌ మాట్లాడుతూ, 'హరీష్‌ శంకర్‌ వండర్‌ ఫుల్‌ టెక్నీషియన్‌. ఆయనకు సాంగ్‌ నచ్చడం మా ఫస్ట్‌ సక్సెస్‌. దర్శకుడు, సంగీత దర్శకుడు, ఛాయాగ్రాహకుడు, వీళ్ళందరినీ వెనుక ఉండి నడిపించిన నిర్మాతలు... ఎవరు లేకపోయినా ఇంత అందంగా సాంగ్‌ వచ్చేది కాదు. రక్షిత్‌ లేకపోతే సాంగ్‌ ఇలా వచ్చేది కాదు' అని అన్నారు. 'ఇళయరాజా గారి రేంజ్‌ కాకపోయినా ఆ టచ్‌ ఉన్న సాంగ్‌ ఇది. చాలా రోజుల తర్వాత ఇంగ్లీష్‌ పదం లేకుండా పూర్తిగా తెలుగు పదాలు ఉన్న సాంగ్‌ రాసిన కిట్టూ విస్సాప్రగడకి థ్యాంక్స్‌' అని నిర్మాత అహితేజ బెల్లంకొండ చెప్పారు.
హరిశ్‌శంకర్‌కి, మా సంగీత దర్శకుడికి థ్యాంక్స్‌. మంచి సాంగ్‌ ఇచ్చాడు. ఈ ఒక్క సాంగే కాదు, మిగతా పాటలు దీన్ని మించి ఉంటాయి. లిరిసిస్ట్‌ కిట్టు ప్రతి పదం అర్థం అయ్యేలా, ప్రతి పదానికి మీనింగ్‌ ఉండేలా రాశారు. కొత్త దర్శకుడైన నన్ను సపోర్ట్‌ చేసిన హీరో హీరోయిన్లు, నిర్మాతలకు ధన్యవాదాలు.
- దర్శకుడు సాయి మోహన్‌ ఉబ్బన
