'సబ్జెక్ట్‌ని నమ్ముకుని, అందుకు తగ్గ ఆర్టిస్టులను, సాంకేతిక నిపుణులను ఎంపిక చేసుకుని, ఎక్కడా కాంప్రమైజ్‌ కాకుండా విజువల్‌ ఫీస్ట్‌గా తీసిన సినిమా 'అల్లంత దూరాన' అని హాస్య నటుడు, ఏ.పి.ఎలక్ట్రానిక్‌ మీడియా అడ్వైజర్‌ అలీ అన్నారు. గతంలో బాలనటుడిగా, ఆ తర్వాత హీరోగా మంచి గుర్తింపు తెచ్చుకున్న విశ్వ కార్తికేయ హీరోగా, ప్రముఖ నటి ఆమని మేనకోడలు హ్రితిక శ్రీనివాస్‌ హీరోయిన్‌గా చలపతి పువ్వల దర్శకత్వంలో ఆర్‌.ఆర్‌.క్రియేటివ్‌ కమర్షియల్‌ పతాకంపై ఈ చిత్రాన్ని నిర్మించారు. శ్రీమతి కోమలి సమర్పణలో నిర్మాత ఎన్‌.చంద్రమోహనరెడ్డి తెలుగు, తమిళ భాషలలో నిర్మించిన ఈ సినిమా ఈనెల 10న విడుదలకు సిద్ధమైంది. ఈ నేపథ్యంలో చిత్ర ప్రీ రిలీజ్‌ వేడుక ప్రసాద్‌ ల్యాబ్‌లో జరిగింది. ఈ వేడుకకు ముఖ్యఅతిథిగా విచ్చేసిన అలీ ట్రైలర్‌ విడుదల చేశారు. 'ఎంతో తపనతో ఒక మంచి ప్రేమకథా సినిమాను ప్రేక్షకులకు అందించాలని తెలుగు, తమిళ భాషలలో తీశాం. ప్రతీ ప్రేక్షకుడు మెచ్చుకునే విధంగా ఈ సినిమా ఉంటుంది' అని నిర్మాత నిర్మాత ఎన్‌. చంద్రమోహనరెడ్డి తెలిపారు. 'మంచి సీనియర్‌ ఆర్టిస్టులు ఈ సినిమాలో నటించారు' అని దర్శకుడు చలపతి పువ్వల చెప్పారు. 'ఈ సినిమా చేయడానికి సబ్జెక్ట్‌ నచ్చడమే ప్రధాన కారణం. మనసులను హత్తుకునేలా ఉంటుంది. రధన్‌ సంగీతం, కళ్యాణ్‌ ఛాయాగ్రహణం అలరిస్తాయి' అని హీరో విశ్వ కార్తికేయ, హీరోయిన్‌ హ్రితిక శ్రీనివాస్‌ అన్నారు.
