''చిట పటమని కసిరితే, గుసగుసమని నసిగితే.. పొగరంతా కరిగేలా ర్యాంపాడిస్తా' అని అమ్మాయిపై ఓ అబ్బాయి చిటపట మంటున్నాడు. ఇక అమ్మాయి ఊరుకుంటుందా? 'తల బిరుసుతో ఎగిరితే, మగ బలుపిక ముదిరితే, మొహమాటం పడకుండా రఫాడిస్తా' అంటూ రఫ్‌గా సమాధానం ఇస్తుందమ్మాయి.
ఇలా అబ్బాయి.. అమ్మాయి మాటలతో కాదండోరు ఏకంగా పాటలతోనే గొడవలు పడుతున్నారు. అసలు వీళ్ల గొడవకి కారణమేంటో తెలుసుకోవాలంటే మాత్రం ఈనెల 18న రిలీజ్‌ అవుతున్న 'శ్రీదేవి శోభన్‌బాబు' సినిమా చూడాల్సిందే నంటున్నారు గోల్డ్‌ బాక్స్‌ ఎంటర్‌టైన్‌మెంట్స్‌ అధినేతలు విష్ణు ప్రసాద్‌, సుస్మిత కొణిదెల.
ఇంతకీ శ్రీదేవి ఎవరు?, శోభన్‌బాబు ఎవరు? వారి మధ్య గొడవేంది? అనేది తెలియాలంటే తప్పకుండా సినిమా చూడాల్సిందేనండోరు. శోభన్‌బాబుగా సంతోష్‌ శోభన్‌.. శ్రీదేవిగా గౌరి జి కిషన్‌ నటించిన చిత్రం 'శ్రీదేవి శోభన్‌బాబు'. ప్రశాంత్‌ కుమార్‌ దిమ్మల దర్శకుడు. ఇటీవల చిత్ర యూనిట్‌ ఈ సినిమా నుంచి 'టామ్‌ అండ్‌ జెర్రీ' లిరికల్‌ సాంగ్‌ను రిలీజ్‌ చేసింది. కమ్రాన్‌ సంగీతంలో కిట్టు విస్సాప్రగడ రాసిన ఈ పాటను రేవంత్‌, సింధుజ శ్రీనివాసన్‌ పాడారు. ఈ సందర్భంగా నిర్మాతలు సుస్మిత కొణిదెల, విష్ణు ప్రసాద్‌ మాట్లాడుతూ, 'మా మనసుకు ఎంతో దగ్గరైన సినిమా. మా అందరిలోని ఇన్నోసెంట్‌ ఎమోషన్స్‌ అన్నీ స్క్రిప్ట్‌కి ట్రాన్స్‌ఫర్‌ అయ్యింది. సంతోష్‌ శోభన్‌, గౌరిలు పాత్రల్లో ఒదిగిపోయారు. మన పక్కన ఇంటిలో జరిగేలాంటి నేెటివిటీ ఉన్న కథతో ప్రశాంత్‌ సినిమాను తెరకెక్కించారు' అని తెలిపారు.
