దర్శకుడు ఎస్వీ కృష్ణారెడ్డి తాజాగా తెరకెక్కిస్తున్న చిత్రం 'ఆర్గానిక్‌ మామ-హైబ్రిడ్‌ అల్లుడు'. కె.అచ్చిరెడ్డి సమర్పణలో అమ్ము క్రియేషన్స్‌, కల్పన చిత్ర పతాకంపై కోనేరు కల్పన నిర్మిస్తున్న ఈ చిత్రంలో బిగ్‌బాస్‌ ఫేం సోహెల్‌, మృణాళిని జంటగా నటిస్తున్నారు. ఈనెల 3న ఈ చిత్రం ప్రేక్షకులు ముందుకు రానున్న నేపథ్యంలో చిత్ర ప్రీ రిలీజ్‌ ఈవెంట్‌ను చిత్ర యూనిట్‌ ఘనంగా నిర్వహించింది. ఇదే వేదికపై నిర్మాత సి.కల్యాణ్‌ తనయుడు పుట్టినరోజు సందర్భంగా కేట్‌ కట్‌ చేశారు.
ఎస్వీ కృష్ణారెడ్డి మాట్లాడుతూ,'ట్రైలర్‌ చూసి ఇక్కడున్న వారు కొట్టిన చప్పట్లతో సినిమా విజయంపై మరింత విశ్వాసం పెరిగింది. ఈ చిత్రంలో విశేషాలు ఉన్నాయి. ప్రేక్షకుల్ని నవ్వుల్లో ముంచెత్తటానికే ప్రతి క్యారెక్టర్‌ని రాసుకున్నాను. తెరమీద పాత్రలు మిమ్మల్ని నవ్విస్తుంటే.. మీరు నవ్వుతూ ఉంటే చూడాలని నేను ఈనెల 3వ తేదీ కోసం ఎదురు చూస్తున్నాను' అని తెలిపారు.
'ఇప్పుడు రిలీజైన ట్రైలర్‌లో ఫ్యామిలీ బంధాలను తెలుపుతూనే, వినోదాన్ని మిక్స్‌ చేసిన విధానం చాలా ఆకట్టుకుంది' అని నిర్మాత సి.కల్యాణ్‌ చెప్పారు.
సమర్పకుడు, నిర్మాత కె.అచ్చిరెడ్డి మాట్లాడుతూ,'తన చిత్రాల ద్వారా తెలుగు ప్రేక్షకుల్లో కృష్ణారెడ్డి సంపాదించిన గుడ్‌విల్‌ను మరింత పెంచే సినిమా ఇది' అని అన్నారు. 'ఈ సినిమాలో నటించడం నా అదృష్టంగా భావిస్తాను. ఎన్నో ఒత్తిడులతో థియేటర్‌కి ప్రేక్షకులను మా సినిమా కచ్చితంగా రిలీఫ్‌ ఇస్తుంది అని కచ్చితంగా చెప్పగలను' అని హీరో సోహైల్‌ అన్నారు.
