ఎం. విజయశేఖర్‌ రెడ్డి సమర్పణలో విజయ గౌతమి ఆర్ట్‌ మూవీస్‌ బ్యానర్‌ పై టి.హేమ కుమార్‌ రెడ్డి నిర్మిస్తున్న చిత్రం 'గాంగేయ'. ఈ చిత్రానికి కథ, మాటలు, స్క్రీన్‌ ప్లే, దర్శకత్వ బాధ్యతలను బి. రామచంద్ర శ్రీనివాస కుమార్‌ నిర్వర్తిస్తున్నారు.
గగన్‌ విహారి, అవ్యుక్త హీరో, హీరోయిన్లుగా నటిస్తున్న ఈ సినిమా ఇటీవల ఘనంగా ప్రారంభమైంది. ఈ కార్యక్రమానికి దర్శకులు సముద్ర ముఖ్య అతిథిగా విచ్చేసి, ముహూర్తపు సన్నివేశానికి క్లాప్‌ కొట్టగా, సమర్పకులు ఎం విజయ శేఖర్‌ రెడ్డి కెమెరా స్విచాన్‌ చేశారు. ఈ సందర్భంగా దర్శకుడు బి.రామచంద్ర శ్రీనివాస కుమార్‌ మాట్లాడుతూ, 'రామానాయుడులా కుటుంబ సమేతంగా చూడదగ్గ సినిమాను నిర్మిస్తున్నాం. దేశ జాతీయ సమగ్రతను చాటి చెప్పేలా.. కుల మత బేధాలు లేకుండా మనిషి మనిషిని ప్రేమిస్తేనే శాంతి చేకూరుతుందనే పాయింట్‌ మీద సినిమా రాబోతోంది. ఈ చిత్రాన్ని జాతీయ స్థాయిలో ఐదు భాషల్లో నిర్మిస్తున్నాం' అని తెలిపారు. 'అందరి సహకారంతో త్వరగా సినిమాను పూర్తి చేయాలని అనుకుంటున్నాం' అని నిర్మాత టి. హేమకుమార్‌ రెడ్డి అన్నారు.
సమర్పకుడు ఎం.విజయ్‌ శేఖర్‌ రెడ్డి మాట్లాడుతూ, 'చాలా మంచి కథతో ఈ సినిమా రాబోతోంది. సినిమా విజయవంతం అవ్వాలని కోరుకుంటున్నాను' అని చెప్పారు.హీరో గగన్‌ విహారి మాట్లాడుతూ, 'అన్ని రకాల ఎమోషన్స్‌తో కూడుకున్న సినిమా ఇది. దైవ భక్తి, దేశ భక్తి, ప్రేమ కథ ఇలా అన్నీ ఈ చిత్రంలో ఉంటాయి. మంచి సినిమాను తీయాలని మా నిర్మాతలు ఎంతో కష్టపడుతున్నారు' అని తెలిపారు. 'తెలుగులో నాకు ఇది మొదటి చిత్రం. ఈ సినిమా కథ, స్క్రిప్ట్‌, నా పాత్ర ఎంతో బాగుంది' అని నాయిక అవ్యుక్త అన్నారు.
