ప్రపంచ వ్యాప్తంగా అందరూ ఎంతో అత్యంత ప్రతిష్టాత్మకంగా భావించే అకాడమీ అవార్డుల (ఆస్కార్‌) ప్రదానోత్సవంలో బాలీవుడ్‌ అగ్రకథానాయిక దీపికా పదుకొనె సందడి చేయనుంది. ఆస్కార్‌ అవార్డుల ప్రజెంటర్‌ ఆమె ఆస్కార్‌ వేదికపై మెరవబోతున్నారు. ఈ విషయాన్ని సోషల్‌మీడియా వేదికగా దీపికా తెలియజేస్తూ ఆస్కార్‌ కమిటీ అధికారికంగా ప్రకటించిన ప్రజెంటర్స్‌ లిస్ట్‌ని అభిమానులతో షేర్‌ చేసుకున్నారు. ఎమిలీ బ్లంట్‌, మైఖేల్‌ బి జోర్డాన్‌, శామ్యూల్‌ ఎల్‌ జాక్సన్‌, డ్వేన్‌ జాన్సన్‌, జోరు సాల్డానా వంటి హాలీవుడ్‌ హేమాహేమీలతో కలిసి అకాడమీ అవార్డులను విజేతలకు దీపికా అందించబోతున్నారు. 'ఇలాంటి అరుదైన గౌరవాన్ని సొంతం చేసుకోవడం చాలా ఆనందంగా ఉంది'
అని దీపికా ఇన్‌స్టా పోస్ట్‌లో తెలిపింది. లాస్‌ ఏంజిల్స్‌లోని డాల్భీ థియేటర్‌లో 95వ ఆస్కార్‌ పురస్కార ప్రదానోత్సవం అంగరంగ వైభవంగా జరుగనుంది. మన దేశం తరఫున 'ఆర్‌ఆర్‌ఆర్‌' సినిమాలోని నాటు..నాటు పాట ఇప్పటికే ఒరిజినల్‌ సాంగ్‌ విభాగంలో పోటీ పడుతోంది. ఇదిలా ఉంటే, ఇదే పాటను ఆస్కార్‌ వేదికగా కాలభైరవ, రాహుల్‌ సిప్లిగంజ్‌ ఆలపించనుండటం విశేషం.
