హీరో సుధాకర్‌ కోమాకుల నటించిన హిలేరియస్‌ ఫ్యామిలీ ఎంటర్‌టైనర్‌ 'నారాయణ అండ్‌ కో'. చిన్న పాపిశెట్టి దర్శకత్వం వహిస్తుండగా, పాపిశెట్టి ఫిల్మ్ ప్రొడక్షన్స్‌, సుఖ మీడియా బ్యానర్‌లపై పాపిశెట్టి బ్రదర్స్‌తో కలిసి సుధాకర్‌ కోమాకుల కూడా ఈ చిత్రాన్ని నిర్మిస్తున్నారు. బుధవారం ఈ సినిమా టీజర్‌ను దర్శకుడు శేఖర్‌ కమ్ముల లాంచ్‌ చేశారు. ఈ సందర్భంగా ఆయన మాట్లాడుతూ, 'సుధాకర్‌ ఈ సినిమాతో తను కోరుకునే స్థాయికి వెళ్తాడని భావిస్తున్నాను. టీజర్‌ చాలా ఫన్‌గా ఉంది. ఇలాంటి జోనర్‌ సినిమాలని ప్రేక్షకులు ఆదరిస్తున్నారు. ఓ రెండు గంటలు మనల్ని మనం మర్చిపోయి చూసే సినిమాలివి. అలాంటి ఫ్లేవర్‌, ఎనర్జీ కనిపిస్తుంది. దర్శకుడు చిన్నా చాలా చక్కగా తీశారు. ఈ సినిమా ఘన విజయం సాధించాలి' అని తెలిపారు. సుధాకర్‌ కోమాకుల మాట్లాడుతూ,'ఈ సినిమా కోట్లాది మందికి రీచ్‌ అవుతుంది. ఎందుకంటే క్రైమ్‌ కామెడీ, మిడిల్‌ క్లాస్‌ అనేది క్రేజీ కాంబినేషన్‌' అని చెప్పారు. 'ఇందులో క్లీన్‌ కామెడీ ఉంటుంది. ఫ్యామిలీ అంతా హ్యాపీగా చూసే సినిమా. మా ప్రయత్నాన్ని ఆదరిస్తానే నమ్మకం ఉంది' అని దర్శకుడు చిన్నా పాపిశెట్టి అన్నారు.
