మైత్రీ మూవీ మేకర్స్‌ సమర్పణలో కిరణ్‌ అబ్బవరం హీరోగా తెరకెక్కిన చిత్రం 'మీటర్‌'. నూతన దర్శకుడు రమేష్‌ కడూరి దర్శకత్వం వహిస్తున్న ఈ చిత్రాన్ని క్లాప్‌ ఎంటర్‌టైన్‌మెంట్‌ నిర్మిస్తోంది. ఈ సినిమా థియేట్రికల్‌ ట్రైలర్‌ బుధవారం విడుదలైంది. ట్రైలర్‌ లాంచ్‌ ఈవెంట్‌లో హీరో కిరణ్‌ అబ్బవరం మాట్లాడుతూ,''మీటర్‌' మీరు ఊహించినదాని కంటే మాస్‌ డబుల్‌, ట్రిపుల్‌ ఉంటుంది. పాటలు, టీజర్‌, ట్రైలర్‌ చూసిన వారంతా కిరణ్‌కి చాలా పెద్ద సినిమా పడిందని అంటున్నారు. ఎన్ని అంచనాలతో థియేటర్‌లోకి వచ్చినా ఆ అంచనాలని అందు కునేలా ఈ సినిమా ఉంటుంది' అని తెలిపారు. 'దర్శకుడు రమేష్‌ చాలా అద్భుతంగా తెరకెక్కించారు. నాయిక అత్యుల రవి చక్కగా చేసింది. కిరణ్‌ని ఫస్ట్‌ టైం ఇంత మాస్‌ కమర్షియల్‌ స్టయిలీష్‌గా చూడబోతున్నారు' అని నిర్మాత చెర్రీ అన్నారు. దర్శకుడు రమేష్‌ కడూరి మాట్లాడుతూ, 'టీజర్‌, పాటలు, ట్రైలర్‌ అదిరిపోయాయి. సినిమా ఇంకా అదిరిపోతుంది. ఏప్రిల్‌ 7 నుంచి అసలైన సమ్మర్‌ స్టార్ట్‌ అవుతుంది' అని తెలిపారు.
