'శాకుంతలం సినిమా చూశాను. అత్యంత అద్భుతంగా అనిపించింది. ఆ క్షణం నుంచి వీడియో సాంగ్స్‌ విడుదల చేసేద్దామా అన్నంత ఆత్రుతగా ఉంది. ఆ విషయాన్నే దర్శకుడు గుణశేఖర్‌తో పంచుకున్నాను. సినిమాలో నాకు అత్యంత ఇష్టమైన పాట 'మల్లికా మల్లికా'. ఈ పాటను వీడియోలో చూడటం చాలా ఆనందకరమైన విషయం. ప్రజలందరికీ ఇప్పుడు ఈ వీడియో సాంగ్‌ని అందుబాటులోకి తీసుకొస్తున్నాం' అని కథానాయిక సమంత తెలిపారు.
ఆమె టైటిల్‌ పాత్రలో నటించిన సినిమా 'శాకుంతలం'. దిల్‌రాజు సమర్పణలో శ్రీ వెంకటేశ్వర క్రియేషన్స్‌ పతాకంపై గుణ టీమ్‌ వర్క్స్‌ నిర్మించిన ఈ చిత్రం ఏప్రిల్‌ 14న విడుదల కానుంది శాకుంతలం. నీలిమ గుణ నిర్మాత. గుణశేఖర్‌ రచించి, దర్శకత్వం వహించారు. 'మల్లికా మల్లికా మాలతీ మాలికా..' అంటూ సాగే పాటను శుక్రవారం విడుదల చేశారు. చైతన్య ప్రసాద్‌ అందించిన సాహిత్యానికి, మణిశర్మ కూర్చిన బాణీకి అందంగా న్యాయం చేశారు సింగర్‌ రమ్య బెహరా. నిర్మాత నీలిమ గుణ మాట్లాడుతూ, 'యూత్‌కి బాగా నచ్చే పాట ఇది. రమ్య బెహర అద్భుతంగా ఆలపించారు. విన్న ప్రతి ఒక్కరూ బావుందన్నారు. ఇప్పుడు వీడియో సాంగ్‌కి హ్యూజ్‌ రెస్పాన్స్‌ వస్తోంది. సినిమాలో ఈ పాట ఇంకా గొప్పగా విజువల్‌ ఫీస్ట్‌లా ఉంటుంది. హంసలు, పువ్వుల లతలు, వనం, పాటలో సమంత ముఖ కవళికలు అందరినీ ఆకట్టుకుంటాయి' అని తెలిపారు. 'ఈ పాటకు యూనిట్‌లోనూ స్పెషల్‌ అభిమానులున్నారు. సమంతకి కూడా చాలా ఇష్టమని చెప్పారు. రికార్డింగ్‌ సమయంలో ఎంతగా ఆస్వాదించామో, తెరమీద చూసుకున్నప్పుడు అంతే సంతోషం కలిగింది. ప్రేక్షకులు కూడా ఇలాగే ఫీల్‌ అవుతారు' అని దర్శకుడు గుణశేఖర్‌ చెప్పారు.
