ఎన్టీఆర్‌ తన కొత్త చిత్రాన్ని యాక్షన్‌తో షురూ చేశారు. 'ఆర్‌ఆర్‌ఆర్‌' తర్వాత ఎన్టీఆర్‌ నటిస్తున్న సినిమా మార్చి 31న ఆరంభమైంది. కొరటాల శివ దర్శకత్వంలో ఈ సినిమా తెరకెక్కుతోంది. హైదరాబాద్‌లోని ఓ ప్యాలెస్‌లో నైట్‌ ఎఫెక్ట్‌లో యాక్షన్‌ సన్నివేశాలను చిత్రీకరిస్తున్నారు. షూటింగ్‌ మొదలు పెట్టిన విషయాన్ని ఎన్టీఆర్‌ సోషల్‌ మీడియా వేదికగా తన అభిమానులతో షేర్‌ చేసుకున్నారు.
'కొరటాల శివతో మరోసారి సినిమా సెట్స్‌లో ఉండటం అద్భుతంగా ఉంది' అని వీడియో రూపంలో చెప్పారు. అంతేకాదు వస్తున్నా.. షూట్‌ బిగిన్స్‌ అని వీడియోని ఎన్టీఆర్‌ ఎండ్‌ చేశారు. ఇది ఎన్టీఆర్‌ నటిస్తున్న 30వ చిత్రం. నందమూరి కళ్యాణ్‌ రామ్‌ సమర్పణలో ఎన్టీఆర్‌ ఆర్ట్స్‌, యువ సుధ ఆర్ట్స్‌ బ్యానర్స్‌పై కొసరాజు హరికృష్ణ, సుధాకర్‌ మిక్కిలినేని ఈ చిత్రాన్ని నిర్మిస్తున్నారు. జాన్వీ కపూర్‌ హీరోయిన్‌గా నటిస్తోంది.
'ఈ సినిమా ఐడియా ఫార్‌ అక్రాస్‌ కోస్టల్‌ ల్యాండ్స్‌ ఆఫ్‌ ఇండియా, ఫర్‌గాటెన్‌ ల్యాండ్స్‌లో సెట్‌ అయిన కథ ఇది. ఈ కథలో మనుషుల కన్నా ఎక్కువ మృగాలు ఉంటారు. భయమంటే ఏంటో తెలియని వాళ్ళని భయపెట్టే కథానాయకుడి కథే ఈ సినిమా' అని దర్శకుడు కొరటాల శివ ఇప్పటికే కథ గురించి చెప్పిన సంగతి తెలిసిందే.
