యోగేశ్వర్‌, అతిధి జంటగా సాయి శివాజీ దర్శకత్వంలో జివివి గిరి నిర్మించిన లవ్‌ అండ్‌ క్రైమ్‌ కామెడీ ఎంటర్టైనర్‌ 'పరారీ'. గాలి ప్రత్యూష సమర్పణలో శ్రీ శంకర ఆర్ట్స్‌ పతాకంపై రూపొందిన ఈ చిత్రం మార్చి 30న గ్రాండ్‌గా ప్రేక్షకుల ముందుకొచ్చి, విడుదలైన అన్నీ థియేటర్స్‌లో విజయవంతంగా ప్రదర్శితమవుతోంది. ఈ నేపథ్యంలో చిత్రయూనిట్‌ ఏర్పాటు చేసిన సక్సెస్‌మీట్‌లో సుమన్‌ మాట్లాడుతూ, 'మా నిర్మాత గిరికి ఈ సినిమా హిట్‌ కావడం చాలా సంతోషంగా ఉంది. ప్రతి గురు, శుక్రవారం ఎంతో మంది హీరోలు ఇండిస్టీకి పరిచయం అవుతుంటారు. అయితే యోగేష్‌ నటించిన ఈ సినిమా చాలా బాగుంది. ఇందులో హీరో ఫైట్స్‌, పాటలు బాగా చేశాడు అనే కామెంట్స్‌ వచ్చాయి. రిలీజ్‌ అయిన ప్రతి చోట ప్రేక్షకులనుండి మంచి రెస్పాన్స్‌ వస్తుంది. ఇందులో నేను పోలీస్‌ ఆఫీసర్‌గా మంచి పాత్రలో నటించాను. తల్లిదండ్రులు పిల్లలతో కలిసి ధైర్యంగా వెళ్లి చూసే విధంగా తెరకెక్కిన సినిమా ఇది' అని తెలిపారు. 'మా సినిమాకు మంచి టాక్‌ రావడం ఆనందంగా ఉంది. ఇందులో హీరో సాంగ్స్‌, ఫైట్స్‌ బాగా చేశాడని చాలా మంది ఫోన్‌ చేసి అభినందిస్తున్నారు. అలాగే డిస్ట్రిబ్యూటర్స్‌ కూడా సినిమా బాగుంది చెపుతున్నారు. అందుకే సోమవారం నుండి థియేటర్స్‌ కూడా పెంచుతున్నాం' అని నిర్మాత గిరి చెప్పారు. హీరో యోగేశ్వర్‌ మాట్లాడుతూ, ' ఇది నా మొదటి చిత్రం. సినిమాని చూసిన వారందరూ చాలా బాగా చేశావని కాంప్లిమెంట్స్‌ ఇస్తుంటే చాలా సంతోషంగా ఉంది' అని అన్నారు.
