రష్మిక మందన ప్రధాన పాత్రలో బ్రీజీ రొమాంటిక్‌ ఫాంటసీ ఎంటర్‌టైనర్‌గా రూపొందుతున్న చిత్రం 'రెయిన్‌బో'. ఈ చిత్రాన్ని డ్రీమ్‌ వారియర్‌ పిక్చర్స్‌ నిర్మాతలు ఎస్‌ఆర్‌. ప్రకాష్‌ బాబు, ఎస్‌ఆర్‌ ప్రభు నిర్మిస్తున్నారు. నూతన దర్శకుడు శాంతరూబన్‌ దర్శకత్వం వహిస్తున్న ఈ చిత్ర ప్రారంభోత్సవం సోమవారం గ్రాండ్‌గా జరిగింది. ముహూర్తపు సన్నివేశానికి అమల అక్కినేని క్లాప్‌ కొట్టగా, అల్లు అర వింద్‌ కెమెరా స్విచాన్‌ చేశారు. సురేష్‌ బాబు స్క్రిప్ట్‌ అందించారు. నటుడు దేవ్‌ మోహన్‌ ఈ సినిమాలో కీలక పాత్ర పోషిస్తున్నారు. జస్టిన్‌ ప్రభాకరన్‌ సంగీతం, భాస్కరన్‌ సినిమాటోగ్రఫీ.. ఈ రెండూ సినిమాలో ప్రధాన ఆకర్షణగా ఉండబోతున్నాయి. నేషనల్‌ అవార్డ్‌ విన్నింగ్‌ ప్రొడక్షన్‌ డిజైనర్‌ బంగ్లాన్‌ ప్రొడక్షన్‌ డిజైన్‌ ఇన్‌ఛార్జ్‌గా పని చేస్తున్నారు. ఈ సందర్భంగా రష్మిక మాట్లాడుతూ, 'రెయిన్‌బో' కోసం చాలా ఎగ్జైటెడ్‌గా ఉన్నాను. దర్శకుడు దర్శకుడు శాంతరూపన్‌ అద్భుతమైన కథతో వచ్చారు' అని తెలిపారు. ''ఒకే ఒక జీవితం' తర్వాత మరో మంచి కథతో మీ ముందుకు రాబోతున్నాం. రష్మికతో సరికొత్త కథాంశంతో రాబోతున్న ఈ సినిమా కూడా తప్పకుండా మిమ్మల్ని అలరిస్తుందని నమ్ముతున్నాం' అని డ్రీమ్‌ వారియర్‌ పిక్చర్స్‌ అధినేత ప్రకాష్‌బాబు చెప్పారు.
