కె.విజయభాస్కర్‌ దర్శకత్వంలో రూపొందుతున్న చిత్రం 'జిలేబి'. ప్రముఖ పారిశ్రామికవేత్త గుంటూరు రామకృష్ణ ఎస్‌ఆర్కే బ్యానర్‌ పై ఈ చిత్రాన్ని నిర్మిస్తున్నారు. అంజు అశ్రాని సమర్పకురాలు. విజయభాస్కర్‌ తనయుడు శ్రీకమల్‌ హీరోగా పరిచయం అవుతున్న ఈ చిత్రంలో శివాని రాజశేఖర్‌ నాయికగా నటిస్తోంది. ఈ చిత్ర ఫస్ట్‌లుక్‌ గ్లింప్స్‌ని అగ్ర కథానాయకుడు వెంకటేష్‌ గ్రాండ్‌గా విడుదల చేశారు. ఈ సందర్భంగా ఆయన మాట్లాడుతూ,'విజయభాస్కర్‌ నా ఫేవరేట్‌ సినిమాలు 'నువ్వు నాకు నచ్చావ్‌, మల్లేశ్వరి' చిత్రాలను ఎంత చక్కగా తీశారో మనకి తెలుసు. ఈ సినిమా కూడా తప్పకుండా ఒక ఫన్‌ఫుల్‌ ఎంటర్‌టైనర్‌ అవుతుంది' అని తెలిపారు. 'మణిశర్మ చాలా మంచి ఆల్బమ్‌ ఇచ్చారు. సతీష్‌ చక్కని విజువల్స్‌ ఇచ్చారు. అంతా ఒక కుటుంబంలా కలిసి ఈ సినిమా చేశాం. సినిమా ఎలా ఉందో మీరు చూసి చెప్పాలి' అని దర్శకుడు కె.విజయభాస్కర్‌ అన్నారు. 'అందరి సహకారంతో షూటింగ్‌ దాదాపు పూర్తయింది. మిగిలిన రెండు పాటలను ఫారిన్‌లో షూట్‌ చేయబోతున్నాం. త్వరలోనే సినిమాని రిలీజ్‌ చేస్తాం' అని నిర్మాతలు చెప్పారు.
