పవన్‌ కల్యాణ్‌ టైటిల్‌ రోల్‌లో నటించిన చిత్రం 'వకీల్‌ సాబ్‌'. కోర్టు రూమ్‌ డ్రామా నేపథ్యంలో సాగే కథతో తెరకెక్కిన ఈ చిత్రం ఏప్రిల్‌ 9తో విజయవంతంగా రెండేళ్లు పూర్తి చేసుకుంది. ఈ సందర్భంగా అభిమానులు ట్విట్టర్‌లో చిట్‌చాట్‌ సెషన్‌ నిర్వహించారు. ఈ సెషన్‌లో డైరెక్టర్‌ వేణుశ్రీరామ్‌ కూడా పాల్గొని, 'వకీల్‌సాబ్‌' తప్పకుండా రీరిలీజ్‌ అవుతుందని, అలాగే 'వకీల్‌సాబ్‌'కి సీక్వెల్‌గా 'వకీల్‌ సాబ్‌ 2' కూడా ఉండబోతుందని చెప్పి అందర్నీ సర్‌ప్రైజ్‌ చేశాడు. ప్రస్తుతం 'వకీల్‌సాబ్‌ 2' స్క్రిప్ట్‌ వర్క్‌ కొనసాగుతుందని తెలిపారు. ఈ డబుల్‌ ధమాకాలాంటి అప్‌డేట్‌ తెలుసుకున్న పవర్‌స్టార్‌ అభిమానులు ఫుల్‌ ఖుషీ అవుతున్నారు. వేణుశ్రీరామ్‌ దర్శకత్వం వహించిన 'వకీల్‌సాబ్‌'లో శృతిహాసన్‌ పవన్‌కళ్యాణ్‌కి జోడీగా నటించగా, అంజలి, నివేదా థామస్‌, అనన్య నాగళ్ల కీలక పాత్రల్లో నటించారు. ఈ ముగ్గురి చుట్టూ తిరిగే కథాంశంతో చివరి వరకు రక్తికట్టించేలా సాగే వకీల్‌సాబ్‌కు తెలుగు ప్రేక్షకులు బ్రహ్మరథం పట్టారు. పవన్‌ కల్యాణ్‌ ప్రస్తుతం క్రిష్‌ దర్శకత్వంలో హరిహరవీరమల్లు, సుజిత్‌ దర్శకత్వంలో ఓజీ, సముద్రఖని డైరెక్షన్‌లో వినోదయ సీతమ్‌ రీమేక్‌, హరీష్‌ శంకర్‌ డైరెక్షన్‌లో ఉస్తాద్‌ భగత్‌ సింగ్‌ సినిమాల్లో సినిమాల్లో నటిస్తున్నారు.
