సాయిధరమ్‌ తేజ్‌ హీరోగా నటిస్తున్న పాన్‌ ఇండియా మిస్టీక్‌ థ్రిల్లర్‌ 'విరూపాక్ష'. సంయుక్తమీనన్‌ కథానాయిక. కార్తీక్‌ దండు దర్శకత్వంలో శ్రీ వెంకటేశ్వర సినీ చిత్ర, సుకుమార్‌ రైటింగ్స్‌ బ్యానర్స్‌పై బాపినీడు బి.సమర్పణలో నిర్మాత బీవీఎస్‌ఎన్‌ ప్రసాద్‌ ఈ చిత్రాన్ని నిర్మిస్తున్నారు. సుకుమార్‌ ఈ చిత్రానికి స్క్రీన్‌ ప్లే అందించారు. పాన్‌ ఇండియా స్థాయిలో తెలుగు, తమిళ, మలయాళ, కన్నడ, హిందీ భాషల్లో ఈనెల 21న ప్రపంచవ్యాప్తంగా ఈ సినిమా రిలీజ్‌ అవుతుంది. మంగళవారం ఈ సినిమా ట్రైలర్‌ను నిర్మాతలు అల్లు అరవింద్‌, దిల్‌ రాజు రిలీజ్‌ చేశారు. నిర్మాత దిల్‌ రాజు మాట్లాడుతూ, 'ట్రైలర్‌ చూశాక వాట్‌ ఎ ట్రైలర్‌ అనిపించింది. గూజ్‌ బమ్స్‌ వచ్చాయి. రేపు సినిమా ఎలా ఉండబోతుందో చూపించారు. పెద్ద సక్సెస్‌ అవుతుంది. నైజాం డిస్ట్రిబ్యూటర్‌ని కాబట్టి ఈ సక్సెస్‌లో నేను కూడా ఓ పార్ట్‌ అవుతాను' అని అన్నారు. 'ఎన్టీఆర్‌ వాయిస్‌ ఓవర్‌తో ఈ సినిమా ప్రమోషన్స్‌ స్టార్ట్‌ అయ్యాయి. తర్వాత పవర్‌స్టార్‌ పవన్‌ కళ్యాణ్‌ టీజర్‌ లాంచ్‌ చేశారు. ఇప్పుడు రాజు, అరవింద్‌ ట్రైలర్‌ను లాంచ్‌ చేశారు. బాపినీడు అధ్వర్యంలో చేసిన సినిమా అందరికీ నచ్చుతుంది' అని చిత్ర నిర్మాత బి.వి.ఎస్‌.ఎన్‌.ప్రసాద్‌ చెప్పారు. హీరో సాయిధరమ్‌ తేజ్‌ మాట్లాడుతూ, ''ఎంతో ప్రేమించి, కష్టపడి చేసిన సినిమా. ఓ మంచి సినిమాను మీ ముందుకు తీసుకొస్తున్నాం' అని తెలిపారు. 'ఈ మధ్య సినిమాలకు ట్రైలర్‌ బట్టి ఓపెనింగ్స్‌ వస్తున్నాయి. ఈ ట్రైలర్‌ చూస్తుంటే పిచ్చ రేంజ్‌లో ఓపెనింగ్స్‌ వస్తాయని 100% అనిపిస్తుంది. 'కాంతార' మ్యూజిక్ డైరెక్టర్‌ ఈ సినిమాకు మ్యూజిక్ అందించటం హ్యాపీ. అన్ని కలిసొచ్చి ఈ సినిమా ఎక్కడో నిలబడుతుంది' అని అల్లు అరవింద్‌ అన్నారు.
