రాఘవ లారెన్స్‌ హీరోగా కతిరేసన్‌ దర్శకత్వంలో రూపొందిన యాక్షన్‌ ఎంటర్‌టైనర్‌ 'రుద్రుడు'. తెలుగు, తమిళ భాషల్లో విడుదల కానుంది. లారెన్స్‌ సరసన ప్రియా భవానీ శంకర్‌ కథానాయికగా నటిస్తుండగా, శరత్‌ కుమార్‌ కీలక పాత్రలో కనిపించ నున్నారు. ఫైవ్‌ స్టార్‌ క్రియేషన్స్‌ ఎల్‌ఎల్‌పి
ఈ చిత్రాన్ని నిర్మిస్తుండగా, కతిరేశన్‌ సమర్పకులుగా వ్యవహరిస్తున్నారు. పిక్సెల్‌ స్టూడియోస్‌ ప్రొడ్యూసర్‌ ఠాగూర్‌ మధు ఈ సినిమాని తెలుగు రాష్ట్రాలలో విడుదల చేస్తున్నారు. ఈ నెల 14న ప్రపంచవ్యాప్తంగా ఈ సినిమా రిలీజ్‌ కానున్న నేపథ్యంలో ఈ చిత్ర ప్రీరిలీజ్‌ ఈవెంట్‌ని గ్రాండ్‌గా నిర్వహించారు. రాఘవ లారెన్స్‌ మాట్లాడుతూ,'రుద్రుడు కథని దర్శకుడు కతిరేసన్‌ చాలా అద్భుతంగా చెప్పారు. అందులో మదర్‌ సెంటిమెంట్‌ నా మనసుని చాలా ఆకట్టుకుంది. నా ప్రతి సినిమాలో ఫ్యామిలీ ఎలిమెంట్స్‌ వుండేలా చూసుకుంటాను. అలాగే మాస్‌, యాక్షన్‌ మిస్‌ కానివ్వను. రుద్రుడులో ఫ్యామిలీ, మాస్‌, యాక్షన్‌, డ్యాన్స్‌ అన్నీ ఉంటాయి' అని చెప్పారు.'ఈ సినిమాలో భాగం కావడం ఆనందంగా ఉంది. ఓ మంచి సినిమాతో మీముందుకు రాబోతున్నాం' అని నాయిక ప్రియా భవానీ శంకర్‌ అన్నారు.
