సోసియో ఫాంటసీ థ్రిల్లర్‌ సినిమాలు ట్రెండ్‌తో నిమిత్తం లేకుండా ఎప్పుడొచ్చినా ప్రేక్షకుల ఆదరణ చూరగొన్నాయి. అలాగే యముడిని సెంటర్‌ ఆఫ్‌ అట్రాక్షన్‌ చేసుకుని రూపొందిన సినిమాలు సైతం ఎంతగానో అలరించాయి. ఇప్పుడు ఆ కోవలోనే 'యమ డ్రామా' చిత్రాన్ని మలచడం విజయానికి సంకేతమని తెలుగు ఫిలిం ప్రొడ్యూసర్స్‌ కౌన్సిల్‌ ప్రెసిడెంట్‌ కె.ఎల్‌.దామోదర ప్రసాద్‌, నిర్మాత డి.ఎస్‌.రావు అన్నారు ఫిల్మీ మెజీషియన్స్‌ పతాకంపై యువచంద్ర, శివకుమార్‌, కౌటిల్య, సుదర్శన్‌ రెడ్డి హీరోలుగా, ప్రియాంక శర్మ (సవారి ఫేమ్‌), నేహాదేశ్‌ పాండే, హమీద హీరోయిన్లుగా నటించారు. టి.హర్షచౌదరి దర్శకత్వంలో తోటకూర శివరామకృష్ణారావు నిర్మించిన ఈ సినిమా విడుదలకు సన్నద్ధమవుతోంది. ఈ సినిమాలోని 'నిను చూసినాకనే...' అనే మొదటి పాటకు కరుణాకర్‌ సాహిత్యం అందించగా, సునీల్‌ కశ్యప్‌ బాణీలు సమకూర్చారు. ఈ వీడియో సాంగ్‌ను హైదరాబాద్‌లో జరిగిన కార్యక్రమంలో అతిథిగా పాల్గొన్న తెలుగు ఫిలిం ప్రొడ్యూసర్స్‌ కౌన్సిల్‌ ప్రెసిడెంట్‌ కె.ఎల్‌.దామోదర ప్రసాద్‌ విడుదల చేశారు.
ఈ సందర్భంగా దర్శకుడు టి.హర్షచౌదరి మాట్లాడుతూ, 'సాయికుమార్‌ మొదటి సారి ఈ సినిమాలో యముడి పాత్రలో నటించడం ఓ హైలైట్‌. మంచి వినోదం, భావోద్వేగాలను రంగరించి, ఆద్యంతం ఆకట్టుకునేలా రూపొందించిన ఈ సినిమాలో యూత్‌కు ఓ మంచి సందేశం కూడా ఉంది. ఫ్యామిలీస్‌, ఫ్రెండ్స్‌, లవర్స్‌ వంటి అన్ని వర్గాల వారు మెచ్చేలా దీనిని మలిచాం' అని చెప్పారు. 'అన్ని కార్యక్రమాలు పూర్తి చేసుకున్న ఈ సినిమాను ఇదే నెలలో విడుదల చేస్తాం' అని తెలిపారు.
