భారీ భారీ డైలాగులు, అట్రాక్ట్‌ చేసే డ్యూయెట్స్‌, ఔరా అనిపించే ఫైట్‌ సీన్స్‌.. సినిమా అనగానే ఇవేకదా మనకు గుర్తొచ్చేవి. అయితే అందుకు పూర్తి భిన్నంగా కేవలం సింగిల్‌ క్యారెక్టర్‌తో సినిమా తీయడమంటే అది గొప్ప సాహసమే అని చెప్పాలి. ఆ సాహసాన్ని చేసి చూపించారు డైరెక్టర్‌ కాకర్ల శ్రీనివాస్‌. కేవలం ఒకే ఒక్క క్యారెక్టర్‌తో 'హలోమీరా' చిత్రంతో ఆయన ప్రేక్షకులను అలరించడానికి రెడీ అయ్యారు. వైవిద్య భరితమైన కథలో ఊహించని ట్విస్టులతో ప్రేక్షకులను థ్రిల్‌ చేయబోతున్నారు. తెరపై కేవలం ఒక అమ్మాయిని మాత్రమే చూపిస్తూ ప్రేక్షకుడి బుర్రలో బోలెడు రోల్స్‌ మెదిలేలా ఈ సినిమాను తెరకెక్కించడం విశేషం. తెరపై కనిపించేది మీరానే అయినా వినిపించే పాత్రలన్నీ ప్రేక్షకుడి మదిలో మెదిలేలా రూపొందించారు. ఇప్పటికే ఈ సినిమాకు సంబంధించిన పోస్టర్స్‌, వీడియోస్‌ రిలీజ్‌ చేసి తన సినిమాలోని వైవిధ్యాన్ని, ప్రయోగాత్మక విషయాలను ప్రేక్షకులకు పరిచయం చేసిన డైరెక్టర్‌ కాకర్ల శ్రీనివాస్‌.. ఈనెల 21న ఈ మూవీని రిలీజ్‌ చేస్తున్నారు. అయితే ఇప్పటికే ఈ సినిమా ఫైనల్‌ కాపీ చూసిన పలువురు సినీ ప్రముఖులు కాకర్ల శ్రీనివాస్‌ ప్రతిభను మెచ్చుకుని, విజయం ఖాయమని ఆకాంక్షించారు.
