ఎన్టీఆర్‌ నటిస్తున్న తన 30వ చిత్రంలో ప్రతినాయకుడిగా బాలీవుడ్‌ నటుడు సైఫ్‌ ఆలీఖాన్‌ నటిస్తారనే వార్తలు గత కొంత కాలంగా వినిపిస్తూనే ఉన్నాయి.
అలాగే ఈ ప్రతినాయకుడి ఆఫర్‌ని సైఫ్‌ తిరస్కరించారనే పుకార్లు సైతం సోషల్‌ మీడియాలో షికార్లు చేశాయి. అయితే వీటన్నింటికి ఎన్టీఆర్‌ 30 చిత్ర బృందం చెక్‌ పెడుతూ మంగళవారం ఓ బిగ్‌ అప్‌డేట్‌ ఇచ్చింది. ఈ సినిమాలో సైఫ్‌ ఆలీఖాన్‌ నటిస్తున్నారని చెబుతూనే చిత్ర బృందంతో ఆయన దిగిన ఫొటోలను షేర్‌ చేశారు. ఎన్టీఆర్‌ కథానాయకుడిగా, కొరటాల శివ దర్శకత్వంలో ఓ పాన్‌ ఇండియా చిత్రం రూపొందుతున్న విషయం తెలిసిందే. నందమూరి కళ్యాణ్‌ రామ్‌ సమర్పణలో ఎన్టీఆర్‌ ఆర్ట్స్‌, యువ సుధ ఆర్ట్స్‌ బ్యానర్స్‌పై కొసరాజు హరికృష్ణ, సుధాకర్‌ మిక్కిలినేని ఈ చిత్రాన్ని నిర్మిస్తున్నారు. జాన్వీ కపూర్‌ హీరోయిన్‌గా నటిస్తోంది. ఈ సినిమా శరవేగంగా షూటింగ్‌ జరుపుకుంటోంది. రామోజీఫిల్మ్‌ సిటీలో జరుపుతున్న షెడ్యూల్‌లో ఇప్పటికే నాయిక జాన్వీకపూర్‌ జాయిన్‌ అయ్యింది. అలాగే లేటెస్ట్‌గా సైఫ్‌ కూడా చిత్రీకరణలో పాల్గొనబోతున్నారు. 'ఈ కథలో మనుషుల కన్నా ఎక్కువ మృగాలు ఉంటారు. భయమంటే ఏంటో తెలియని మృగాలుంటారు. దేవుడంటే భయం లేదు. చావంటే భయం లేదు. కానీ, ఒకే ఒకటంటే భయం వారికి. ఆ భయమేంటో మీ అందరికీ తెలిసే ఉంటుంది. భయం ఉండాలి. భయం అవసరం. భయపెట్టడానికి ఈ సినిమాలో నా ప్రధాన పాత్ర ఏ రేంజ్‌కి వెళ్తుందనేది ఎమోషనల్‌ రైడ్‌' అని దర్శకుడు కొరటాల శివ ఈ చిత్ర కథ గురించి తెలిపారు. ఈ చిత్రాన్ని తెలుగు, హిందీ, తమిళ, కన్నడ, మలయాళ భాషల్లో వచ్చే ఏడాది ఏప్రిల్‌ 5న గ్రాండ్‌గా ప్రేక్షకుల ముందుకు తీసుకురాబోతున్నారు.
