యువ కథానాయిక ప్రియాంక మోహన్‌ అరుదైన అవకాశాన్ని దక్కించుకుంది. అగ్ర కథానాయకుడు పవన్‌కళ్యాణ్‌తో స్క్రీన్‌ షేర్‌ చేసుకోనుంది. ఈ లక్కీ ఛాన్స్ ఆమెకు దర్శకుడు సుజీత్‌తో డి.వి.వి.దానయ్య నిర్మిస్తున్న 'ఓజీ' సినిమా ద్వారా లభించింది. డీవీవీ ఎంటర్‌టైన్‌మెంట్‌ పతాకంపై రూపొందుతున్న ఈ సినిమా మొదటి షెడ్యూల్‌ ఈనెల 15న ముంబైలో ప్రారంభమైంది. పవన్‌ కళ్యాణ్‌ ఈ వారం ప్రారంభంలోనే ఈ సినిమా సెట్స్‌లో అడుగుపెట్టి అభిమానుల్లో ఉత్సాహం నింపారు. అభిమానుల ఉత్సాహాన్ని రెట్టింపు చేస్తూ, తాజాగా మేకర్స్‌ ఈ చిత్రానికి సంబంధించిన మరో ఆసక్తికరమైన అప్‌డేట్‌ ఇచ్చారు. 'డాక్టర్‌', 'డాన్‌', 'గ్యాంగ్‌ లీడర్‌', 'శ్రీకారం' వంటి చిత్రాల్లో తన నటనతో మంచి గుర్తింపు తెచ్చుకున్న ప్రియాంక మోహన్‌ ఈ సినిమాలో కథానాయికగా ఎంపికైంది. ఈ నటి సోషల్‌ మీడియాలో విపరీతమైన అభిమానుల ఫాలోయింగ్‌ను కలిగి ఉంది. ఆమె తన రూపం, శైలితో ప్రేక్షకులకు ఎంతగానో దగ్గరైంది. పవన్‌ కళ్యాణ్‌, ప్రియాంక మోహన్‌ జంటను తెరపై చూడాలని సినీ ప్రియులు ఎంతో ఉత్సాహంగా ఎదురుచూసున్నారు.ప్రేక్షకులు ఎంతగానో ఎదురుచూస్తున్న ఈ సినిమా మొదటి షెడ్యూల్‌ ముంబై, పరిసర ప్రాంతాలలో జరుగుతోంది.
ఈ నెలాఖరు వరకు జరగనున్న ఈ షెడ్యూల్‌లో ప్రధాన తారాగణంపై యాక్షన్‌ సన్నివేశాలతో పాటు పలు కీలక సన్నివేశాలను చిత్రీకరిస్తున్నారు. దర్శకుడు సుజీత్‌ ఎక్కడా రాజీపడకుండా అద్భుతమైన యాక్షన్‌ చిత్రాన్ని అందించడానికి కృషి చేస్తున్నారు.
