జీవన్‌ హీరోగా సోమ సుందరం.బి యమ్‌ దర్శకత్వంలో తెరకెక్కిన చిత్రం 'మన్యం రాజు' వాయుపుత్ర ఆర్ట్స్‌ బ్యానర్‌ పై ఈ సినిమా నిర్మాణం పూర్తి చేసుకుంది. రామానాయుడు ప్రివ్యూ థియేటర్‌లో ఈ చిత్ర టీజర్‌ను నిర్మాత సురేష్‌బాబు రిలీజ్‌ చేశారు. ఈ సందర్భంగా ఆయన మాట్లాడుతూ, 'ఈ సినిమా టీజర్‌ చాలా ఆసక్తికరంగా ఉంది. సినిమా చూడాలి అని కూతుహలాన్ని రేపుతోంది. సినిమా ఖచ్చితంగా తెలుగులో సక్సెస్‌ అవ్వాలని, ప్రొడ్యూసర్‌కి, డైరెక్టర్‌కి మరిన్ని అవకాశాలు రావాలని కోరుకుంటున్నాను. సినిమాలో పని చేసిన వాళ్ళ అందరికి అల్‌ బెస్ట్‌' అని తెలిపారు.
'టీజర్‌ చాలా బాగా వచ్చింది. ఈ సినిమా మంచి ఘన విజయం సాధించాలి అని మనస్ఫూర్తిగా ఆశిస్తున్నాను' అని హీరో సప్తగిరి చెప్పారు.
హీరో జీవన్‌ మాట్లాడుతూ, 'సురేష్‌ బాబు చేతుల మీదుగా టీజర్‌ రిలీజ్‌ చేయటం చాలా ఆనందంగా ఉంది. సినిమా కూడా చాలా బాగా వచ్చింది. మీకు తప్ప కుండా నచ్చుతుంది అనే నమ్మకం ఉంది. నాకు ఈ అవకాశాన్ని ఇచ్చిన మా ప్రొడ్యూసర్‌కి, డైరెక్టర్‌ సోముకి థ్యాంక్స్‌' అని అన్నారు. దర్శకుడు సోమసుందరం.బి యమ్‌ మాట్లాడుతూ, 'కష్టపడి సినిమా చేశాం. టీజర్‌ కూడా బాగా నచ్చుతుంది అని ఆశిస్తున్నాను. మా హీరో జీవన్‌, ప్రొడ్యూసర్‌ నా మీద ఉంచిన నమ్మకాన్ని జయించాను' అని తెలిపారు.
నిర్మాతలు విజరుబాబు, ప్రవీణ్‌, భీమాస్‌ అశోక్‌ మాట్లాడుతూ, 'సురేష్‌ బాబు చేతుల మీదుగా మా సినిమా టీజర్‌ రిలీజ్‌ అయినందుకు చాలా హ్యాపీగా ఉంది. మేము అనుకున్నట్టే చాలా బాగా వచ్చింది సినిమా. హీరో జీవన్‌ కెరీర్‌లో మరొక మంచి సినిమా అవుతుంది అని మేమంతా గట్టిగా నమ్ముతున్నాం' అని అన్నారు.
ప్రస్తుతం పోస్ట్‌ ప్రొడక్షన్‌ పనులు జరుగుతున్నాయి. సమ్మర్‌ స్పెషల్‌గా మేలో రిలీజ్‌కి ప్లాన్‌ చేస్తున్నారు. ఈ కార్యక్రమంలో పరిపూర్ణానంద స్వామి, ఎంవి వి సత్యనారాయణ, లయన్‌ వెంకట్‌, ప్రద్యుమ్న తదితరులు పాల్గొని చిత్ర విజయాన్ని ఆకాంక్షించారు. సుమన్‌, భీమాస్‌ అశోక్‌, జయచంద్ర, బేబీ పరిణిక తదితరులు నటిస్తున్నారు. ఈ చిత్రానికి కో - ప్రొడ్యూసర్స్‌ : భీమాస్‌ అశోక్‌ , వంశి పాలకూరు, మురళి ప్రసాదరావు.
