అఖిల్‌ అక్కినేని, సురేందర్‌ రెడ్డి క్రేజీ స్టైలిష్‌ స్పై యాక్షన్‌ ఎంటర్‌టైనర్‌ 'ఏజెంట్‌'. ఈనెల 28న ప్రపంచవ్యాప్తంగా గ్రాండ్‌ రిలీజ్‌కు సిద్ధంగా ఉంది. ఏకె ఎంటర్‌టైన్‌మెంట్స్‌, సురేందర్‌ 2 సినిమా పతాకాలపై రామబ్రహ్మం సుంకర ప్రతిష్టాత్మకంగా నిర్మించారు. ఈ సినిమా విడుదల నేపథ్యంలో వరంగల్‌లో 'ఏజెంట్‌' మాసీవ్‌ ప్రీరిలీజ్‌ ఈవెంట్‌ని నిర్వహించారు. అక్కినేని నాగార్జున ముఖ్య అతిధిగా హాజరైన ఈ వేడుక చాలా గ్రాండ్‌గా జరిగింది. మంత్రి ఎర్రబెల్లి దయాకర్‌రావు, మేయర్‌ గుండు సుధారాణి, ఎంపీ పసునూరి దయాకర్‌, ఎమ్మెల్యే అరూరి రమేష్‌ ఈ వేడుకలో పాల్గొన్నారు.
అక్కినేని నాగార్జున మాట్లాడుతూ, 'వరంగల్ పోరాటాలకు అడ్డా. వీరత్వానికి ఇంటి పేరు.. వైల్డ్‌ వరంగల్. దర్శకుడు సురేందర్‌ రెడ్డి కొత్త జోనర్‌తో ఒక చక్కటి సినిమా, థ్రిల్లింగ్‌ సినిమా, స్పై సినిమా మీ ముందు పెడుతున్నారు. అందుకే ఇది బ్లాక్‌ బస్టర్‌ అవుతుందని నమ్ముతున్నాను. అఖిల్‌ ఈ సినిమా గురించి ఇంట్లో చెబుతుంటే బ్లాక్‌ బస్టర్‌ అవ్వడానికి కావాల్సిన అన్ని ఎలిమెంట్స్‌ ఇందులో ఉన్నాయి. ఇందులో మీరు స్టన్నింగ్‌ విజువల్స్‌ చూస్తారు. మమ్ముట్టి కథ ఓప్పుకున్నారంటే అది మాములుగా ఉండదు' అని అన్నారు.
'ఏజెంట్‌ రెండేళ్ళ ప్రయాణం. నేను, సురేందర్‌ రెడ్డి కలసినప్పుడు ఏదో క్రేజీగా చేసేద్దామనుకున్నాం. క్రేజీగానే చేశాం. ఏజెంట్‌ నాకు ధైర్యాన్ని, నమ్మకాన్ని ఇచ్చింది. అనిల్‌ సుంకర ఏజెంట్‌కి బ్యాక్‌ బోన్‌. మమ్ముట్టి ఈ ప్రాజెక్ట్‌ ఒప్పుకోవడం, ఆయనతో కలిసి పని చేయడం గౌరవంగా భావిస్తున్నాను. ప్రేక్షకులు, అభిమానుల ప్రేమ, బలం కోసమే నేను పని చేస్తున్నాను. మీరు ఎంత ఇచ్చినా తీసుకుంటాను. ఏప్రిల్‌ 28న థియేటర్‌ లో కలుద్దాం' అని హీరో అఖిల్‌ అక్కినేని చెప్పారు. దర్శకుడు సురేందర్‌ రెడ్డి మాట్లాడుతూ, 'అఖిల్‌ సిిక్స్‌ ప్యాక్‌ బాడీ చేశాడని అందరూ అంటున్నారు. కానీ నేను అఖిల్‌ లో చూసింది కసి. ఏదో చేయాలి, ఏదో సాధించాలనే కసి చూశాను. అదే నన్ను ముందుకు నడిపించింది. తన కోసమే ఈ సినిమా చేశాను. సినిమా చాలా బావుంటుంది' అని తెలిపారు. 'సురేందర్‌ రెడ్డి ఈ కథ చెప్పినపుడే అఖిల్‌ని ఇలా ఊహించారు. యువ సామ్రాట్‌తో సినిమా చేయాలని అనుకున్నాను. కానీ నేను వచ్చేటప్పటికీ ఆయన కింగ్‌ అయిపోయారు. మరో యువ సామ్రాట్‌తో ఏజెంట్‌ చేశాం' అని నిర్మాత అనిల్‌ సుంకర చెప్పారు.
