రోషన్‌, కోమల్‌ బెన్‌, సాక్షి, స్రవంతి, పూజా డే కీలక పాత్రధారులుగా రూపొందుతున్న చిత్రం 'రాణిగారి గదిలో దెయ్యం'. అబిద్‌ దర్శకత్వంలో మౌంట్‌ ఎవరెస్ట్‌ పిక్చర్స్‌ పతాకంపై పి.వి.సత్యనారాయణ నిర్మించారు. చిత్రీకరణ పూర్తి చేసుకున్న ఈ చిత్రం త్వరలోనే ప్రేక్షకుల ముందుకురానుంది. ఈ నేపథ్యంలో హైదరాబాద్‌లో ఏర్పాటు చేసిన విలేకర్ల సమావేశంలో నిర్మాతల మండలి కార్యదర్శి ప్రసన్నకుమార్‌, ఆర్‌.కె.గౌడ్‌ ఈ చిత్ర ట్రైలర్‌ను విడుదల చేసి, సినిమా విజయవంతం కావాలని ఆకాంక్షించారు. ప్రసన్నకుమార్‌ మాట్లాడుతూ, 'హర్రర్‌ కంటెంట్‌ చిత్రాలకి ఎప్పుడూ ఆదరణ ఉంటుంది. అదే కోవలో రూపొందిన ఈ సినిమా కూడా బిగ్‌ సక్సెస్‌ కావాలి' అని అన్నారు.''మా బ్యానర్‌లో వస్తున్న ఐదో సినిమా ఇది. హర్రర్‌ కాన్సెప్ట్‌తో వినోదాత్మకంగా సాగే చిత్రమిది. అన్ని వర్గాల ప్రేక్షకులకు కావాల్సిన అన్ని అంశాలూ ఈ సినిమాలో ఉన్నాయి. త్వరలో విడుదల చేస్తాం' అని నిర్మాత పి.వి.సత్యనారాయణ చెప్పారు. దర్శకుడు అబిద్‌ మాట్లాడుతూ, 'నన్ను నమ్మి నిర్మాత అవకాశం ఇచ్చారు. హర్రర్‌ కథతో చక్కని సినిమా తీశాం. షేర్‌ అద్భుతమైన సంగీతం అందించారు. ఈ జర్నీలో నాకు సహకరించిన ప్రతి ఒక్కరికీ కృతజ్ఞతలు' అని తెలిపారు. సిరాజ్‌ మాట్లాడుతూ, 'తెలుగు ఇండిస్టీలో దర్శకుడిగా, సంగీత దర్శకుడిగా, డిస్ట్రిబ్యూటర్‌గా ఉన్నా. మంచి కథతో ఈ సినిమా చేశాం. చక్కని పాటలు కుదిరాయి. తప్పకుండా ఈ సినిమా ప్రేక్షకులను అలరిస్తుందనే నమ్మకంతో ఉన్నాం' అని అన్నారు.ఈ చిత్రానికి కెమెరా: ప్రవీణ్‌.
