'లక్ష్యం', 'లౌక్యం' వంటి బ్లాక్‌ బస్టర్స్‌ తర్వాత గోపీచంద్‌, డైరెక్టర్‌ శ్రీవాస్‌ కలయికలో వస్తున్న హ్యాట్రిక్‌ మూవీ 'రామబాణం'. పీపుల్‌ మీడియా ఫ్యాక్టరీ పతాకంపై నిర్మాత టీజీ విశ్వప్రసాద్‌ ఈ చిత్రాన్ని నిర్మిస్తున్నారు. గోపీచంద్‌ సరసన డింపుల్‌ హయతి కథానాయికగా నటిస్తోంది. మే 5న ఈ చిత్రం ప్రేక్షకుల ముందుకు వస్తున్న నేపథ్యంలో చిత్ర యూనిట్‌ నిర్వహించిన ప్రెస్‌మీట్‌లో హీరో గోపీచంద్‌ మాట్లాడుతూ,'నిర్మాత విశ్వప్రసాద్‌, వివేక్‌ కూచిభొట్ల ఎక్కడా రాజీ పడకుండా సినిమాకి కావాల్సిన ప్రతీదీ సమకూర్చి, సినిమాని గ్రాండ్‌గా నిర్మించారు. శ్రీవాస్‌తో 'లక్ష్యం', 'లౌక్యం' చేశాను. మూడో సినిమా చేద్దామని అనుకున్నప్పుడు 'లక్ష్యం', 'లౌక్యం'లా ఫ్యామిలీ ఎంటర్‌టైనర్‌ చేయాలని అనుకున్నాం. దీనికి తగ్గట్టుగా భూపతి రాజా దగ్గర ఉన్న కథ వినగానే చాలా నచ్చింది. మధు, అబ్బూరి రవి కూడా ఈ కథకు చాలా హెల్ప్‌ చేశారు. డింపుల్‌ చాలా చక్కగా నటించింది. మిక్కీ జే మేయర్‌తో చేయడం ఇదే మొదటిసారి. చాలా అద్భుతమైన పాటలు ఇచ్చారు. ఇప్పటికే పాటలకు మంచి రెస్పాన్స్‌ వచ్చింది. మే 5న రామబాణం మీ ముందుకు వస్తోంది. అందరూ థియేటర్‌కి వెళ్లి చూడండి. మీ అందరికీ నచ్చుతుందనే నమ్మకం ఉంది' అని అన్నారు.
'గోపీచంద్‌, నేను సినిమా చేస్తున్నామని తెలిసినప్పటి నుంచి హ్యాట్రిక్‌ కాంబో అనే పాజిటివ్‌ వైబ్‌ అందరి నుంచి వచ్చింది. స్క్రిప్ట్‌ వర్క్‌, హార్డ్‌ వర్క్‌, టీం వర్క్‌ అన్నీ కలిపి సినిమా ఎక్స్‌ట్రార్డినరీగా వచ్చింది. ఈ సినిమా అవుట్‌ పుట్‌ చూశాక చాలా నమ్మకం కలిగింది. ఎంటర్‌టైన్‌మెంట్‌, సెంటిమెంట్‌, ఎమోషన్స్‌ అన్నీ అద్భుతంగా కుదిరిన సినిమా ఇది. ఈ సమ్మర్‌కి మంచి ఫ్యామిలీ ఎంటర్‌టైనర్‌గా ఈ సినిమా అలరిస్తుంది' అని దర్శకుడు శ్రీవాస్‌ చెప్పారు.'గోపీచంద్‌ యాక్షన్‌ని ఇష్టపడే ప్రేక్షకులకు కూడా రామబాణం ఒక పండగలా ఉంటుంది. మంచి విజయం సాధిస్తుంది' అని సహ నిర్మాత వివేక్‌ కూచిభొట్ల చెప్పారు.
