విశ్వక్‌ సేన్‌ కథానాయకుడిగా సితార ఎంటర్‌టైన్‌మెంట్స్‌, ఫార్చ్యూన్‌ ఫోర్‌ సినిమాస్‌తో కలిసి నిర్మిస్తున్న విఎస్‌11 (వర్కింగ్‌ టైటిల్‌) పూజా కార్యక్రమాలతో బుధవారం ఉదయం ప్రారంభమైంది. సూర్యదేవర నాగ వంశీ, సాయి సౌజన్య నిర్మిస్తున్న ఈ చిత్రానికి కృష్ణ చైతన్య రచన, దర్శకత్వం వహిస్తున్నారు. శ్రీకర స్టూడియోస్‌ ఈచిత్రానికి సమర్పకులుగా వ్యవహరిస్తోంది. చిత్ర ప్రారంభం సందర్భంగా నిర్మాత సుధాకర్‌ చెరుకూరి కెమెరా స్విచాన్‌ చేయగా, నిర్మాత దిల్‌ రాజు క్లాప్‌ ఇచ్చారు. మొదటి షాట్‌కి నిర్మాత వెంకట్‌ బోయనపల్లి దర్శకత్వం వహించారు. దర్శకులు వెంకీ అట్లూరి, నిర్మాత రామ్‌ ఆచంట తమ చేతుల మీదుగా స్క్రిప్ట్‌ని చిత్ర బృందానికి అందజేశారు.
మే నుండి ఈ సినిమా రెగ్యులర్‌ చిత్రీకరణ ప్రారంభమవుతుంది. ఈ చిత్రంలో నటిస్తున్న ఇతర ముఖ్య తారాగణం వివరాల్ని అతి త్వరలోనే ప్రకటించనున్నారు. 90వ దశకంలో రాజమండ్రి పరిసరాల నేపథ్యంలో జరిగిన కథతో రూపొందుతోన్న ఈ సినిమా కోసం ప్రముఖ సాంకేతిక నిపుణులు పని చేస్తున్నారు. ప్రేక్షకులను సరికొత్త కథలతో అలరించే క్రమంలో విశ్వక్‌సేన్‌ మరో మంచి కథతో ప్రేక్షకుల ముందుకు రాబోతున్నారు.
