వెంకటేష్‌ నటిస్తున్న తన 75వ చిత్రం 'సైంధవ్‌'. శైలేష్‌ కొలను దర్శకత్వం వహిస్తున్నారు. నిహారిక ఎంటర్‌టైన్‌మెంట్స్‌ బ్యానర్‌పై వెంకట్‌ బోయనపల్లి ఈ చిత్రాన్ని ప్రతిష్టాత్మకంగా నిర్మిస్తున్నారు. బాలీవుడ్‌ యాక్టర్‌ నవాజుద్దీన్‌ సిద్ధిక్‌ ఈ చిత్రంతో టాలీవుడ్‌లోకి అరంగేట్రం చేస్తున్నారు. మనోజ్ఞ పాత్రలో శ్రద్ధా శ్రీనాథ్‌ ఫిమేల్‌ లీడ్‌గా నటిస్తుండగా, ఇటీవలె రుహాని శర్మ పాత్రను డాక్టర్‌ రేణుగా పరిచయం చేశారు. తాజాగా శుక్రవారం ఈ సినిమాలో మరో కీలక పాత్రను పరిచయం చేశారు మేకర్స్‌. బ్యూటీఫుల్‌ అండ్‌ టాలెంటెడ్‌ ఆండ్రియా జెర్మియా ఈ చిత్రంలో జాస్మిన్‌ పాత్రలో నటిస్తున్నారు. బ్లాక్‌ అండ్‌ బ్లాక్‌ అవుట్‌ ఫిట్‌తో చేతిలో తుపాకీతో ఇంటెన్స్‌ లుక్‌తో కనిపించింది ఆండ్రియా. పోస్టర్‌లో స్పోర్ట్స్‌ బైక్‌ బాగా హైలెట్‌ అవుతోంది. ప్రధాన తారాగణం పాల్గొంటున్న 'సైంధవ్‌' షూటింగ్‌ ప్రస్తుతం వైజాగ్‌లో శరవేగంగా జరుగుతోంది. పాన్‌ ఇండియా చిత్రంగా దీన్ని దక్షిణాది భాషలు, హిందీలో డిసెంబర్‌ 22న క్రిస్మస్‌ సందర్భంగా ప్రేక్షకుల ముందుకు తీసుకురాబోతున్నారు. ఈ చిత్రానికి సహ నిర్మాత: కిషోర్‌ తాళ్లూరు, డీవోపీ: ఎస్‌.మణికందన్‌, ఎడిటర్‌: గ్యారీ బిహెచ్‌.
