'గబ్బర్‌ సింగ్‌' బ్లాక్‌ బస్టర్‌ తర్వాత పవన్‌ కళ్యాణ్‌, హరీష్‌ శంకర్‌ కాంబోలో రాబోతున్న మాస్‌ ఎంటర్‌టైనర్‌ 'ఉస్తాద్‌ భగత్‌ సింగ్‌'. మైత్రీ మూవీ మేకర్స్‌ పతాకంపై నవీన్‌ యెర్నేని, వై. రవిశంకర్‌ నిర్మిస్తున్న ఈ చిత్రంలో శ్రీలీల కథానాయికగా నటిస్తోంది. దేవి శ్రీ ప్రసాద్‌ సంగీతం అందిస్తున్నారు. ఈ చిత్ర నిర్మాణ పనులు శరవేగంగా జరుగుతున్నాయి. ఇప్పటికే చిత్రీకరణ ప్రారంభమైంది. పది రోజుల పాటు జరిగిన తొలి షెడ్యూల్‌లో కీలక సన్నివేశాలను తెరకెక్కించారు. మొదటి షెడ్యూల్‌ ఎడిటింగ్‌ పనులు కూడా ఇప్పటికే మొదలయ్యాయి. ఇక తాజాగా మ్యూజిక్ సిట్టింగ్స్‌ కూడా మొదలవ్వడం విశేషం. పవన్‌ కళ్యాణ్‌, హరీష్‌ శంకర్‌, దేవి శ్రీ ప్రసాద్‌ కలయికలో వచ్చిన 'గబ్బర్‌ సింగ్‌' ఎంతటి ఘన విజయాన్ని సాధించిందో తెలిసిందే. ఈ విజయంలో సంగీతం కూడా కీలక పాత్ర పోషించింది. అలాంటి మ్యాజిక్‌నే మరోసారి రిపీట్‌ చేయడానికి దేవిశ్రీ ప్రసాద్‌, దర్శకుడు హరీష్‌శంకర్‌ సిద్ధమయ్యారు.
