అనుష్క శెట్టి, నవీన్‌ పోలిశెట్టి కాంబినేషన్‌లో వస్తోన్న చిత్రం 'మిస్‌ శెట్టి మిస్టర్‌ పోలిశెట్టి'. ఈ చిత్రంపై ఇప్పటికే మంచి అంచనాలున్నాయి. యూవీ క్రియేషన్స్‌ బ్యానర్‌లో రూపొందిన ఈ చిత్రానికి పి.మహేష్‌ కుమార్‌ దర్శకుడు. రీసెంట్‌గా విడుదల చేసిన ఈ చిత్ర టైటిల్‌, ఫస్ట్‌ లుక్‌ పోస్టర్‌, ఫస్ట్‌ లిరికల్‌ సాంగ్‌కు మంచి స్పందన వచ్చింది. లేటెస్ట్‌గా ఈ చిత్ర టీజర్‌ను శ్రీ నిధి కాలేజ్‌లో ఇంజనీరింగ్‌ విద్యార్థుల సమక్షంలో చిత్ర బృందం గ్రాండ్‌గా రిలీజ్‌ చేసింది.
ఈ మూవీ ఒక చెఫ్‌, ఒక స్టాండప్‌ కమెడియన్‌ మధ్య సాగే కథగా ఇప్పటికే చెప్పారు. టీజర్‌లో దాన్ని మరింత ఎంటర్టైనింగ్‌గా చూపించారు. రవళి పాత్రలో నటించిన అనుష్క ప్రొఫెషనల్‌ చెఫ్‌. పెళ్లంటే ఇష్టం ఉండదు. ఆ విషయంలో ఫ్యామిలీ సపోర్ట్‌ కూడా ఉంటుంది. ఇటు పేరెంట్స్‌కు ఇష్టం లేకపోయినా స్టాండప్‌ కమెడియన్‌గా రాణించాలని ప్రయత్నించే కుర్రాడు. ఈ ఇద్దరికీ అనుకోకుండా పరిచయమై, ఆ పరిచయం స్నేహంగా మారుతుంది. మరి ఆ స్నేహం ఏ తీరాలకు చేరింది అనేది తెలియాలంటే సినిమా చూడాల్సిందే అన్నట్టుగా ఉందీ టీజర్‌. ఈ ఇద్దరి మధ్య వచ్చే సన్నివేశాలు చాలా ఫ్రెష్‌గా ఉన్నాయి. ముఖ్యంగా అనుష్క.. నవీన్‌ను ఇంటర్వ్యూ చేస్తూ.. నీ స్ట్రెంత్‌ ఏంటీ అని అడుగుతుంది.. అందుకు నవీన్‌ 'అవకాశం ఉన్నప్పుడల్లా కామెడీ చేస్తుంటా' అని చెబుతాడు.. వీక్‌ నెస్‌ గురించి అడిగితే.. 'సిట్యుయేషన్‌కు సంబంధం లేకుండా కామెడీ చేస్తుంటా' అని చెప్పే డైలాగ్‌ ఫన్నీగా ఉంది. చివర్లో నీ టైమింగ్‌ ఎప్పుడూ ఇంతేనా అని అడిగితే కామెడీ టైమింగ్‌ మాత్రం పర్ఫెక్ట్‌గా ఉంటుంది మేడమ్‌ అని చెబుతాడు.దీంతో ఈ సినిమా నుంచి కూడా బోలెడు కామెడీ ఎక్స్‌పెక్ట్‌ చేయొచ్చు అని ఇన్‌డైరెక్ట్‌గా చెప్పారు. మొత్తంగా టీజర్‌ చాలా ఇంప్రెసివ్‌గా ఉంది. ఖచ్చితంగా ఓ మంచి ఎంటర్టైనింగ్‌ మూవీని చూడబోతున్నాం అనేలా టీజర్‌తోనే చెప్పారు. తెలుగుతో పాటు తమిళం, కన్నడ, మళయాల భాషల్లో విడుదల కాబోతోన్న ఈ చిత్రంలో జయసుధ, మురళీ శర్మ, తులసి తదితరులు నటించారు.
