రాజ్‌తరుణ్‌ హీరోగా శ్రీ శ్రీదేవి ప్రొడక్షన్స్‌ అనే నూతన నిర్మాణ సంస్థ 'పురుషోత్తముడు' చిత్రాన్ని పూజా కార్యక్రమాలతో మేడే నాడు రామా నాయుడు స్టూడియోలో ఘనంగా ప్రారంభిం చింది. రమేష్‌ తెజావత్‌, ప్రకాష్‌ తెజావత్‌ నిర్మిస్తున్న ఈ చిత్రానికి రామ్‌ భీమన దర్శకత్వం వహిస్తున్నారు. ముంబయికి చెందిన హాసిని సుధీర్‌ కథానాయికగా పరిచయం అవుతుంది. ముహూర్తపు సన్నివేశానికి దర్శకుడు ఇంద్రగంటి మోహన్‌ కృష్ణ కెమెరా స్విచ్చాన్‌ చేయగా, నిర్మాత సి. కళ్యాణ్‌ క్లాప్‌ కొట్టారు.
దర్శకుడు వీరశంకర్‌ గౌరవ దర్శకత్వం వహించారు. చిత్ర దర్శకుడు రామ్‌ భీమన మాట్లాడుతూ, 'పురుషోత్తముడు అనే మంచి టైటిల్‌, కథతో మీ ముందుకు వస్తున్నాం. పాన్‌ ఇండియా ఆర్టిస్టులు నటించబోయే ఈ సినిమా మాటలపరంగా చాలా చక్కగా ఉంటుంది. ఈ సినిమా చిత్రీకరణ హైదరాబాద్, రాజమండ్రి, కేరళతోపాటు ఓ పాటను విదేశాలలో తీయబోతున్నాం. జూన్‌ 1నుంచి రెగ్యులర్‌ చిత్రీకరణ జరుగుతుంది' అని చెప్పారు. 'పూర్తి వినోదంతోపాటు చక్కటి ఫ్యామిలీ డ్రామా, ఎమోషన్స్‌ అన్నీ ఉంటాయి. అయితే నేను ఎందులో పురుషోత్తముడు అనేది సినిమాలో చూడాల్సిందే' అని హీరో అన్నారు. నిర్మాతలు మాట్లాడుతూ, 'ఈ కథ ఇంతవరకు రాలేదని అనిపించింది. అందుకే భారీ బడ్జెట్‌తో తీస్తున్నాం' అని తెలిపారు.
