'లక్ష్యం', 'లౌక్యం' వంటి సూపర్‌ హిట్‌ సినిమాల తర్వాత గోపీచంద్‌, డైరెక్టర్‌ శ్రీవాస్‌ కాంబినేషన్‌లో వస్తున్న హ్యాట్రిక్‌ ఫిల్మ్ 'రామబాణం'. పీపుల్‌ మీడియా ఫ్యాక్టరీ బ్యానర్‌లో టీజీ విశ్వప్రసాద్‌ నిర్మిస్తున్న ఈ చిత్రానికి వివేక్‌ కూచిభొట్ల సహ నిర్మాత. ఇందులో గోపీచంద్‌ సరసన నాయికగా డింపుల్‌ హయతి నటిస్తుండగా, జగపతి బాబు, కుష్బూ ప్రధాన పాత్రలు పోషిస్తున్నారు. మిక్కీ జె. మేయర్‌ స్వరకర్త. ఈనెల 5న ఈ సినిమా థియేటర్లలో భారీస్థాయిలో విడుదల కానుంది. ఈ నేపథ్యంలో తాజాగా ఈ చిత్ర ప్రీ రిలీజ్‌ వేడుకను మేకర్స్‌ నిర్వహించారు.
హీరో గోపీచంద్‌ మాట్లాడుతూ, 'ఇంత మంచి కథ ఇచ్చిన భూపతిరాజాకి ధన్యవాదాలు. కమర్షియల్‌ ఫార్మాట్‌లో ఒక ఫ్యామిలీ ఎమోషన్‌ ఉంటే ఎంత బాగుంటుందో ఈ కథ అంత బాగుంటుంది. ఈ కథని వాసు అద్భుతంగా తెరకెక్కించారు. మా గత చిత్రాలు లక్ష్యం, లౌక్యం సినిమాల మాదిరిగానే ఎంటర్టైన్మెంట్‌, ఎమోషన్స్‌ అన్ని ఉంటాయి. విశ్వప్రసాద్‌, వివేక్‌ చాలా మంచి నిర్మాతలు. ఖచ్చితంగా 'రామబాణం' మంచి విజయం సాధిస్తుందని కోరుకుంటున్నాను' అని అన్నారు.
''ఖిలాడీ' విడుదల కాకముందే శ్రీవాస్‌ నన్ను ఈ సినిమాకి ఎంపిక చేశారు. ఈనెల 5న మీ ఫ్యామిలీతో వెళ్లి మా సినిమా చూడండి. అందరికీ నచ్చుతుంది' అని కథానాయిక డింపుల్‌ హయతి చెప్పారు. దర్శకుడు శ్రీవాస్‌ మాట్లాడుతూ,'నిర్మాతలు విశ్వ, వివేక్‌, నా లక్కీ హీరో గోపీచంద్‌.. వీళ్ళందరూ ఎప్పుడూ చాలా పాజిటివ్‌గా ఉంటారు. ఈ సినిమా అనౌన్స్‌ చేసినప్పటి నుంచే ఒక పాజిటివ్‌ వైబ్రేషన్‌ ఉంది. హ్యాట్రిక్‌ కాంబినేషన్‌ అనేది మాకు మైండ్‌లో తిరుగుతూ ఉంది. అది మాకు కాన్ఫిడెన్స్‌ ఇచ్చింది. ఫస్ట్‌ కాపీ చూసినప్పుడు ఒక మంచి అనుభూతి కలిగింది. ఈ సినిమాకి గోపీచంద్‌, జగపతి బాబు రెండు పిల్లర్స్‌. ఇద్దరూ ఎమోషన్స్‌ అద్భుతంగా పండించారు' అని తెలిపారు. సహ నిర్మాత వివేక్‌ కూచిభొట్ల మాట్లాడుతూ, 'మేము మంచి సినిమా తీశాం. మా సినిమాకి మంచి విజయాన్ని అందిస్తారని ఆశిస్తున్నాం' అని చెప్పారు.
