శ్రీకృష్ణ క్రియేషన్స్‌ బేనర్‌ పై గౌరు గణబాబు సమర్పణలో గౌరికృష్ణ నిర్మాతగా డా.అనిల్‌ విశ్వనాథ్‌ దర్శకత్వంలో రూపొందుతున్న చిత్రం 'మా ఊరి పొలిమేర -2'. సత్యంరాజేష్‌, డా.కామాక్షి భాస్కర్ల, గెటప్‌ శ్రీను, రాకేందు మౌళి, అక్షత, బాలాదిత్య, సాహితి దాసరి, రవి వర్మ, చిత్రం శ్రీను ముఖ్య పాత్రల్లో నటిస్తున్నారు. ఈ చిత్రం షూటింగ్‌ పూర్తి చేసుకుని ప్రస్తుతం పోస్ట్‌ ప్రొడక్షన్‌ పనుల్లో బిజీగా ఉంది. శనివారం ఈ చిత్ర ఫస్ట్‌ లుక్‌ను మంత్రి తలసాని శ్రీనివాస్‌ యాదవ్‌ లాంచ్‌ చేశారు.
ఈ సందర్భంగా నిర్మాత గౌరికృష్ణ మాట్లాడుతూ, ''మా ఊరి పొలిమేర' చిత్రాన్ని చూసి చాలా ఎగ్జైట్‌ అయ్యాను. దానికి సీక్వెల్‌గా వస్తున్న ఈ సినిమాని మా బ్యానర్‌లో చేస్తున్నందుకు సంతోషంగా ఉంది. దర్శకుడు 'మా ఊరి పొలిమేర'ను మించి ఈ చిత్రాన్ని తెరకెక్కించారు. త్వరలోనే టీజర్‌ రిలీజ్‌ చేస్తాం' అని తెలిపారు. ''మా ఊరి పొలిమేర' చిత్రాన్ని ప్రేక్షకులందరూ బాగా ఆదరించారు. ఈ చిత్ర విడుదల తేదీని త్వరలోనే ప్రకటిస్తాం' అని దర్శకుడు డా. అనిల్‌ విశ్వనాథ్‌ అన్నారు.
