హీరో విజయ్‌ దేవరకొండ బర్త్‌ డే స్పెషల్‌ గా 'ఖుషీ' మూవీ నుంచి బ్యూటీఫుల్‌ మెలోడియస్‌ సాంగ్‌ను మేకర్స్‌ రిలీజ్‌ చేశారు. శివ నిర్వాణ డైరెక్షన్‌లో ఈ చిత్రాన్ని మైత్రీ మూవీ మేకర్స్‌ నిర్మిస్తున్నారు. ఇప్పటికే ఈ చిత్రంపై భారీ అంచనాలున్నాయి. వాటిని రెట్టింపు చేసేలా విజరు దేవరకొండ బర్త్‌ డే స్పెషల్‌ సాంగ్‌ కనిపిస్తోంది. హేషమ్‌ అబ్దుల్‌ వాహబ్‌ స్వరపరిచి, ఈ పాటను ఆయనే పాడారు. ఈ గీతాన్ని దర్శకుడు శివ నిర్వాణ రాయడం ఓ విశేషమైతే, 'నా రోజా నువ్వే.. నా దిల్‌ సే నువ్వే, నా అంజలి నువ్వే గీతాంజలి నువ్వే' అంటూ పాట మొత్తంలో లెజెండరీ డైరెక్టర్‌ మణిరత్నం సినిమాల పేర్లు కలిసి వచ్చేలా సాహిత్యం ఉండటం మరో విశేషం. ఏ సినిమా నుంచి అయినా మొదటి పాట వస్తోందంటే అది ఆ మూవీ ఫ్లేవర్‌ను తెలియజేస్తుంది. 'ఖుషీ' నుంచి వచ్చిన ఈ పాట కూడా ఓ ప్లెజెంట్‌ లవ్‌ స్టోరీని చూడబోతున్నాం అనేలా చేసింది. శివ నిర్వాణే నృత్య రీతులు సమకూర్చిన ఈ గీతాన్ని కశ్మీర్‌లోని అందమైన లొకేషన్స్‌లో చిత్రీకరించారు. సమంత కశ్మీరి యువతిగా కనిపిస్తోంది. తన ప్రేమను గెలుచుకునే యువకుడుగా విజయ్‌ నటించాడు. వీరి మధ్య కెమిస్ట్రీ అద్భుతంగా కుదిరిందని పాట చూస్తే అర్థమౌతోంది. ఫస్ట్‌ సాంగ్‌తోనే బెస్ట్‌ ఇంప్రెషన్‌ వేసిన ఈ చిత్రాన్ని తెలుగుతో పాటు తమిళం, కన్నడ, మళయాల, హిందీ భాషల్లో సెప్టెంబర్‌ 1న విడుదల చేయబోతున్నారు.
