Authorization
Mon Jan 19, 2015 06:51 pm
నువ్వుల వినోద్, ఆరోహి జంటగా చిరుగూరు చెంచయ్య సుగుణమ్మ సమర్పణలో శ్రీ చరణ్ సెన్సేషనల్ మూవీస్ పతాకంపై స్వీయ దర్శకత్వంలో సీహెచ్. ప్రభాకర్(చరణ్) నిర్మిస్తున్న చిత్రం 'ఇది నా సెల్ఫీ'. శ్రీనివాస్ మాలపాటి సంగీతం అందించిన ఈ చిత్ర ఆడియో లాంచ్ గురువారం జరిగింది. అతిథులుగా విచ్చేసిన దర్శకుడు ఎన్.శంకర్, సాగర్, దేవిప్రసాద్, సాయి వెంకట్ సంయుక్తంగా పాటలను విడుదల చేశారు.
ఈ సందర్భంగా ఎన్.శంకర్ మాట్లాడుతూ, 'ట్రైలర్, చిత్ర పాటలు చాలా బాగున్నాయి. శ్రీనివాస్ మాలపాటి మంచి పాటలను అందించారు. పాటలన్నీ దేనికదే వెరైటీగా ఉన్నాయి. కథలో అన్ని ప్రత్యేకతలున్నాయనుకుంటున్నా. మ్యూజిక్కు స్కోప్ ఉంది. చరణ్ సినిమా కోసం చాలా కష్టపడ్డాడు. సినిమా విజయం సాధిస్తుందని నమ్ముతున్నా. ఈ టీమ్ను ప్రోత్సహించాలి' అని అన్నారు.
'సినిమా పిచ్చి ఉంటే తప్పేమి కాదు, అది గౌరవం. అలా సినిమా పిచ్చి ఉన్న వాళ్ళంతా ఈ సినిమాను తీశారనిపిస్తుంది. అన్ని మసాలాలు మేళవించి రూపొందించారు. సినిమా విజయం సాధించి డబ్బులు, పేరు రావాలి' అని దేవి ప్రసాద్ తెలిపారు. మరో దర్శకుడు సాగర్ చెబుతూ, 'కొత్త ప్రయత్నం సక్సెస్ సాధించాలి' అని చెప్పారు. నవ్యాంధ్ర ఫిల్మ్ ఛాంబర్ అధ్యక్షులు ఎస్వీఎన్ఆర్ మాట్లాడుతూ, 'ఈ సినిమాను నవ్యాంధ్ర ఫిల్మ్ ఛాంబర్పై విడుదల చేస్తున్నాం. పాటలు, విజువల్స్ ఆకట్టుకుంటున్నాయి. సినిమాను ఆదరించాలని కోరుకుంటున్నా' అని చెప్పారు.
'గతంలో ఎన్నో సినిమాల్లో చిన్న చిన్న పాత్రలు పోషించా. నన్ను హీరోగా గుర్తించిన దేవుడు ప్రభాకర్. ఆయనకు జీవితాంతం రుణపడి ఉంటా' అని హీరో నువ్వుల వినోద్ తెలిపారు. దర్శక, నిర్మాత ప్రభాకర్ చెబుతూ, 'సస్పెన్స్ హర్రర్ కామెడీ చిత్రమిది. మంచి సందేశం ఉంటుంది. సెల్ఫీల వల్ల ఎలాంటి ప్రమాదాలు జరుగుతున్నాయి. టెక్నాలజీ వల్ల ఉపయోగాలు, నష్టాలను తెలిపే కథాంశంతో ఈ సినిమాను తెరకెక్కిస్తున్నాను ' అని చెప్పారు.