Authorization
Mon Jan 19, 2015 06:51 pm
శ్రీకాంత్, సునీల్, శ్రీ, పృథ్వీ, ప్రవీణ్, శ్రీ కార్తికేయ, అభిరామ్, హరీష్ గౌతమ్, ప్రధాన పాత్రధారులుగా వి.సముద్ర దర్శకత్వంలో రూపొందుతున్న చిత్రం 'జై సేన'. వి.విజయలక్ష్మి సమర్పణలో శివమహాతేజ ఫిల్మ్స్ పతాకంపై వి.సాయి అరుణ్ కుమార్ నిర్మిస్తున్న ఈ చిత్ర టైటిల్ లోగో ఆవిష్కరణ కార్యక్రమం గురువారం జరిగింది. నటుడు సునీల్ లోగోని ఆవిష్కరించారు. ఆయన మాట్లాడుతూ, 'ఈ సినిమాకి స్క్రిప్టే సూపర్ స్టార్. పరిచయం అయినప్పట్నుంచి, చివరి వరకు ఒకేలా ఉండే వ్యక్తుల్లో సముద్ర ఒకరు. ఆయనకు నేను సహకరించారని చెప్పడం కంటే ఆయనే నాకు సపోర్ట్నిచ్చారని చెప్పొచ్చు. ఇందులో మంచి పాత్ర ఇచ్చారు. ఇప్పటి వరకు వినోదభరిత పాత్రల్లో కనిపించా. ఇందులో నాలోని వినోదంతోపాటు ఓ వైల్డ్ క్యారెక్టర్ని చూస్తారు' అని అన్నారు. 'శ్రీకాంత్, సునీల్తోపాటు నలుగురు కొత్త హీరోలతో ఈ సినిమాని రూపొందించాను. షూటింగ్ పూర్తయ్యింది. ప్యాచ్ వర్క్ మిగిలుంది. పది కాలాలపాటు నిలిచిపోయేలా మంచి సినిమాలు తీయాలని శివమహాతేజ ఫిల్మ్స్ పేరుతో బ్యానర్ని స్థాపించాం. ఇందులో తొలి ప్రయత్నంగా చేస్తున్న ఈ సినిమా పెద్ద విజయం సాధిస్తుందని నమ్ముతున్నాం. పవన్ కళ్యాణ్ ఆశయాలకు సంబంధించిన పార్టీ 'జనసేన'. ఆయన భావాలకు సంబంధించిన చిత్రం 'జైసేన'. నా ప్రతి సినిమాల్లో సామాజిక అంశాలున్నట్టు ఇందులో కూడా సోషల్ కాజ్ ఉంటుంది. రవిశంకర్ బ్రహ్మాండమైన పాటలు అందించారు. కో ప్రొడ్యూసర్ శిరీష్ రెడ్డి నాకు అన్ని విధాలుగా బ్యాక్బోన్లా నిలిచారు. అన్ని కార్యక్రమాలు పూర్తి చేసి వచ్చే నెలలో విడుదల చేయడానికి ప్లాన్ చేస్తున్నాం' అని చిత్ర దర్శకుడు వి.సముద్ర తెలిపారు. సంగీత దర్శకుడు రవిశంకర్ చెబుతూ, 'నా జర్నీ ప్రారంభమైంది సముద్రతో. పవర్ఫుల్ యాక్షన్ సినిమా ఇది. సూపర్ డూపర్ హిట్ కావాలని కోరుకుంటున్నా' అని చెప్పారు. 'దర్శకుడు సముద్ర ఓ సైనికుడిలా మమ్మల్ని నడిపించారు. సునీల్, శ్రీకాంత్ మాకు ఎంతో సపోర్ట్ చేశారు. వారితో తెరని పంచుకోవడం గొప్ప అనుభూతినిచ్చింది' అని శ్రీకార్తికేయ చెప్పారు. ఇందులో అభిరామ్, ప్రవీణ్, హరీష్, శిరీష్రెడ్డి, గోపీ పాల్గొన్నారు.